अखनूर सेक्टरमध्ये दहशतवादी हल्ला; तिघांचा मृत्यू

जम्मू - जम्मू काश्मीरमधील खौर भागातील अखनूर सेक्टरमध्ये आज (सोमवार) पहाटे दहशतवाद्यांनी जनरल रिझर्व्ह अभियांत्रिकी दलाच्या (जीआरईएफ) कॅम्पवर केलेल्या हल्ल्यात तीन कामगारांचा मृत्यू झाला.

पोलिसांनी दिलेल्या माहितीनुसार, आज पहाटे अंधाराचा फायदा घेत दहशतवाद्यांनी अखनूर सेक्टरमधील बाटल गावाजवळील जीआरईएफच्या कॅम्पवर हल्ला केला. दहशतवाद्यांनी कॅम्पच्या दिशेने गोळीबार केला. या गोळीबारात तीन कामगारांचा मृत्यू झाला. हल्ल्यानंतर दहशतवादी पळून जाण्यात यशस्वी ठरले.

या परिसरात नाकाबंदी करण्यात आली असून, दहशतवाद्यांचा शोध घेण्यात येत आहे. बाटल गावाजवळील प्रत्यक्ष नियंत्रण रेषेपलिकडून (एलओसी) दहशतवाद्यांनी भारतीय हद्दीत घुसून हल्ला केल्याची शक्यता वर्तविण्यात येत आहे. एलओसीपासून हा कॅम्प दोन किमी अंतरावर आहे. लष्कर आणि पोलिसांकडून हाय अलर्ट घोषित करण्यात आला आहे.