जेएनयूत 'लाल सलाम' ; एन. साई बालाजी अध्यक्षपदी

नवी दिल्ली : दिल्लीतील जवाहरलाल नेहरू विद्यापीठातील (जेएनयू) विद्यार्थी संघाची निवडणूक नुकतीच पार पडली. या निवडणुकीमध्ये पुन्हा एकदा डाव्या संघटनांच्या 'लेफ्ट युनिटी'ला बहुमत मिळाले आहे. त्यामुळे डाव्या संघटनेचे अध्यक्षपदाचे उमेदवार एन. साई बालाजी यांची विद्यार्थी संघनेच्या अध्यक्षपदी निवड करण्यात आली.

याशिवाय विद्यार्थी संघटनेच्या चारही पदांवर डाव्या संघटनेने विजय मिळवला आहे. या निवडणुकीत अखिल भारतीय विद्यार्थी परिषदेच्या (एबीव्हीपी) सर्व उमेदवारांचा पराभव झाला. तर 'बिरसा फुले आंबेडकर स्टुडेंट असोसिएशन' तिसऱ्या स्थानावर आहे. त्यामुळे जेएनयूमध्ये पुन्हा एकदा 'लाल सलाम'च्या घोषणा ऐकायला मिळण्याची शक्यता आहे. या निवडणुकीदरम्यान शनिवारी झालेल्या तोडफोडीमुळे येथे मतमोजणी थांबविण्यात आली होती. मात्र, आज येथे तणावपूर्ण परिस्थितीत मतमोजणी पूर्ण करण्यात आली.

दरम्यान, 'जेएनयू' विद्यार्थी संघाच्या चार महत्वाच्या पदांसाठी शुक्रवारी (ता.14) मतदान झाले होते. त्यानंतर शनिवार मतमोजणीला सुरवात झाली. या मतमोजणीदरम्यान गदारोळ झाला. मतपेट्या पळवून नेण्याचा प्रयत्न झाला होता आणि तोडफोडही करण्यात आली होती.