...तर लाहोरमध्ये तिरंगा फडकला असता: भाजप नेता

लखनौः जम्मू-काश्मीरमधील पुलवामा येथे झालेल्या दहशतवादी हल्ल्यानंतर भारतीय हवाई दलाने बालाकोट येथे केलेल्या हल्ल्यावेळी विमान जर थोडावेळ तिथे थांबले असते तर लाहोरमध्ये तिरंगा फडकला असता, असे भारतीय जनता पक्षाचे नेते संगीत सोम यांनी म्हटले आहे.

उत्तर प्रदेशमधील शामली येथे आयोजित करण्यात आलेल्या रॅलीदरम्यान बोलताना संगीत सोम म्हणाले, 'बालाकोटमध्ये जेथे आपले हवाई दल पोहचले ते ठिकाण लाहोरपासून खूप जवळ आहे. मित्रांनो, ते ठिकाण एवढे जवळ आहे की, दोन मिनिट आणखी तेथे थांबलो असतो तर तिरंगा लाहोरमध्येही फडकला असता.'

संगीत सोम यांच्या भाषणाचा व्हिडिओ सोशल मीडियावर व्हायरल झाला आहे. सरधना मतदारसंघाचे प्रतिनिधीत्व करत असलेले आमदार सोम हे आपल्या वक्तव्यांमुळे नेहमी चर्चेत असतात. सोम यांचे नाव 2013 मध्ये मुझफ्फरनगर दंगलीत आले होते. प्रक्षोभक भाषण केल्याचा त्यांच्यावर आरोप आहे.

दरम्यान, बालाकोट येथे केलेल्या हवाई हल्ल्यानंतर पंतप्रधान नरेंद्र मोदी, अमित शाह यांच्यासह अनेक नेते आपल्या भाषणात पाकिस्तानला चोख प्रत्युत्तर दिल्याचा मुद्दा भाषणात उपस्थित करत आहेत.