राहुल अध्यक्षपदी; आता प्रियांका गांधी राजकारणात येणार? 

नवी दिल्ली : काँग्रेसच्या अध्यक्षपदाची सूत्रे राहुल गांधी यांनी अधिकृतरित्या हाती घेतल्यानंतर आता प्रियांका गांधी यांच्या राजकारण प्रवेशाची चर्चा जोरात सुरु झाली आहे. किंबहुना, आगामी लोकसभा निवडणुकीमध्ये प्रियांका गांधी अमेठी किंवा रायबरेली या गांधी घराण्याच्या हुकमी मतदारसंघातून रिंगणात उतरतील, अशी शक्‍यता राजकीय विश्‍लेषक वर्तवत आहेत. 

राहुल गांधी यांच्याकडे पक्षाची सर्व सूत्रे सोपविल्यानंतर सोनिया गांधी यांनी राजकारणातून निवृत्तीचे सूतोवाच केले होते. या संकेताचा अर्थ लावत 'त्या लोकसभा निवडणूक लढविणार की नाही' यावर कालपासून चर्चा सुरू झाली आहे. सोनिया गांधी रायबरेलीतून निवडून येत आहेत, तर अमेठी हा राहुल गांधी यांचा मतदारसंघ आहे. सोनिया गांधी यांच्या निवृत्तीच्या वक्तव्यानंतर रायबरेलीतून प्रियांका गांधी निवडणूक लढविणार असल्याचे संकेत मिळत आहेत. 

या सर्व चर्चांच्या पार्श्‍वभूमीवर 'रायबरेलीतून 2019 ची निवडणूक सोनिया गांधीच लढवतील' असे स्पष्टीकरण खुद्द प्रियांका गांधी यांनी दिले आहे. 'एनडीटीव्ही'शी बोलताना प्रियांका यांनी हा खुलासा केला. 'रायबरेलीतून मी निवडणूक लढविण्याचा प्रश्‍नच येत नाही. माझी आईच तिथून निवडणूक लढवेल' असे त्यांनी या वृत्तवाहिनीशी बोलताना सांगितले. 

राहुल गांधी यांनी आज (शनिवार) एका सोहळ्यामध्ये पक्षाची सूत्रे हाती घेतली. या कार्यक्रमामध्ये प्रियांका गांधी यांच्या संभाव्य राजकारण प्रवेशाबाबत काही संकेत मिळतील, अशी राजकीय विश्‍लेषकांना अपेक्षा होती. मात्र या कार्यक्रमात प्रियांका गांधी आणि त्यांचे पती रॉबर्ट वद्रा यांनी व्यासपीठावर न बसता उत्तर प्रदेशमधील काँग्रेसच्या इतर नेत्यांबरोबर बसणे पसंत केले.