काँग्रेस नेत्यांची मानसिकता देशविरोधी : रविशंकर

काँग्रेस नेत्यांची मानसिकता देशविरोधी : रविशंकर

नवी दिल्ली : हवाई दलाच्या कारवाईत ठार झालेल्या दहशतवाद्यांची संख्या विचारणाऱ्या कॉंग्रेसवर सत्ताधारी भाजपने "कॉंग्रेस नेत्यांची मानसिकता देशविरोधी असून, सवंग राजकारणासाठी देशाचे मनोधैर्य खच्ची केले जात आहे,' असा हल्ला चढवला आहे. मात्र, 300 दहशतवादी ठार झाल्याचा अमित शहा यांनी जाहीर केलेला आकडा हा त्यांचा अंदाज असल्याची सारवासारवही भाजपने केली आहे.

केंद्रीय कायदामंत्री रविशंकर प्रसाद यांनी भाजप मुख्यालयात पत्रकार परिषद घेऊन कॉंग्रेस नेत्यांवर जोरदार टिकास्त्र सोडले. अर्थात, ही पत्रकार परिषद भाजपचे माध्यम प्रमुख या नात्याने असून, हवाई दलाच्या विमानांनी बालाकोटमध्ये केलेल्या हल्ल्याचा तपशील जाहीर करण्याबाबत सरकार ठरवेल, असे म्हणत प्रसाद यांनी या मुद्द्यावर बोलण्याचे टाळले. परंतु, विरोधकांवर विशेषतः कॉंग्रेस नेते दिग्विजयसिंह, कपिल सिब्बल आणि पी. चिदंबरम या नेत्यांवर प्रसाद यांनी कडाडून हल्ला चढवला.

कपिल सिब्बल यांनी परदेशी माध्यमांचा हवाला देत कारवाईत ठार झालेल्या दहशतवाद्यांच्या संख्येच्या दाव्यांवरून सरकारला लक्ष्य केले होते. त्याचे उत्तर देताना प्रसाद म्हणाले की, कॉंग्रेसच्या नेत्यांना भारतीय हवाई दलावर आणि वार्तांकन करणाऱ्या भारतीय प्रसारमाध्यमांवर विश्‍वास नाही. परंतु, बाहेरच्या देशात प्रसिद्ध झालेल्या मुद्द्यांवर प्रश्‍न विचारले जात आहेत. मोदींच्या परराष्ट्र धोरणाने पाकिस्तानला एकाकी पाडले. जगातील कोणत्याही देशाने भारताच्या हवाई दलाच्या कारवाईचा पुरावा मागितला नाही. परंतु, यावर कॉंग्रेसचा विश्‍वास नसून मतांच्या राजकारणासाठी देशाचे मनोधैर्य खच्ची केले जात आहे. देशाची अस्मिता, सुरक्षा आणि दहशतवादाशी संघर्षाचा हा मुद्दा आहे.

हवाई दलाने पाकिस्तानात घुसून कारवाई केली. मात्र कपिल सिब्बल, चिदंबरम ही मंडळी पाकिस्तानची भाषा बोलत आहेत. दिग्विजयसिंह हे पुलवामाचा दहशतवादी हल्ला दुर्घटना असल्याचे म्हणत आहेत. त्यांनी झाकीर नाईकला मानवतावादी ठरवले होते आणि ओसामा बिन लादेनला "ओसामाजी' म्हटले होते. सोनिया गांधी, राहुल गांधींची फूस असल्याशिवाय हे नेते असे बोलणारच नाहीत. त्यामुळे भाजप कार्यकर्त्यांनी ग्रामपंचायतीपासून ते जिल्हापातळीपर्यंत सर्व टप्प्यांवर या नेत्यांचा बुरखा फाडावा आणि राहुल गांधी, सोनिया गांधींकडून उत्तर मागावे, असे प्रसाद म्हणाले. 

शहांची आकडेवारी अंदाजे 

पक्षाध्यक्ष अमित शहा यांनी दिलेली आकडेवारी अंदाजे असल्याची सारवासारव प्रसाद यांनी केली. बालाकोटमध्ये परिणामकारक हल्ला झाल्याच्या, तेथे रुग्णवाहिका गेल्याच्या बातम्या भारतीय माध्यमांमध्ये प्रसिद्ध झाल्या आहेत.

याच परिस्थितीजन्य पुराव्यांच्या आधारे पक्षाध्यक्ष अमित शहा यांनी ठार झालेल्या दहशतवाद्यांच्या संख्येचा अंदाज व्यक्त केला असावा. यातील मुख्य मुद्दा आहे की प्रभावी हल्ला झाला आहे आणि त्यात मोठी हानी झाली आहे. सैन्यावर, हवाई दलावर पूर्ण विश्‍वास आहे, अशीही पुस्ती त्यांनी जोडली. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com