इंधन दरवाढीविरुद्ध आंदोलन

नवी दिल्ली : इंधन दरवाढ आणि महागाईच्या मुद्द्यावर सरकारला घेरण्यासाठी काँग्रेसच्या महागाईमुक्त भारत आंदोलनाला आज सुरवात झाली. इंधनाचे दर कमी करण्याच्या मागणीसाठी दिल्लीत राहुल गांधी आणि अन्य काँग्रेस नेत्यांनी संसदेजवळ धरणे आंदोलन केले. गॅस सिलिंडर, मोटार सायकल यांना पुष्पहार घालून दरवाढीची खिल्ली उडविण्यात आली.

या आंदोलनांतर्गत काँग्रेसने दोन ते चार एप्रिल दरम्यान तालुका आणि जिल्हा पातळीवर, तर सात एप्रिलला प्रत्येक राज्याच्या राजधानीत निदर्शनांची घोषणा केली आहे. आंदोलनाचा पहिला टप्पा म्हणून आज संसदेजवळील विजय चौकात राहुल यांच्यासह लोकसभेतील गटनेते अधीररंजन चौधरी, राज्यसभेतील विरोधी पक्षनेते मल्लिकार्जुन खर्गे, अभिषेक सिंघवी, के. सी. वेणुगोपाल, शक्तीसिंह गोहिल यांच्यासह अन्य काँग्रेस खासदारांनी निदर्शने केली. राहुल यांनी मोटार सायकल तसेच गॅस सिलिंडरला पुष्पहार घालून आंदोलनाला सुरवात केली.

मागील दहा दिवसांत नऊ वेळा पेट्रोल आणि डिझेलच्या किमती वाढविण्यात आल्या असून याचा थेट फटका सर्वात गरिबांना आणि मध्यमवर्गीयांना बसत आहे.दरम्यान, सकाळी आंदोलनानंतर दुपारी महिला काँग्रेस कार्यकर्त्या संसदेला घेराव घालण्यासाठी जाऊन पोचल्या. यामुळे सुरक्षा यंत्रणांची चांगलीच तारांबळ उडाली. आंदोलकांना रोखण्यासाठी रेडक्रॉस मार्गावरील संसदेची दोन्ही प्रवेशद्वारे बंद करण्यात आली होती. त्यामुळे संसदेतून बाहेर पडणाऱ्यांना आंदोलन संपेपर्यंत ताटकळत थांबावे लागले.

पंतप्रधान नरेंद्र मोदींनी निवडणुकीच्यावेळी दरवाढ होऊ दिली नाही. आता दर वाढविले जात आहेत. गॅस सिलिंडरचे दर दुप्पट झाले असून दिल्लीत पेट्रोल १०२ रुपये लिटरवर पोहोचले आहे. असे आजपर्यंत कधी झाले नव्हते. सरकारचे धोरण स्पष्ट आहे की गरिबांच्या खिशातून पैसे काढा आणि दोन चार उद्योगपतींच्या हातात द्या.

- राहुल गांधी, काँग्रेस नेते