Loksabha 2019 : राहुल आणि मोदींच्या जॅकेटचा धमाका

जबलपूर : लोकसभा निवडणुकीच्या निमित्ताने राजकीय वारे जोरात वाहत असल्याने स्थानिक व्यापारीही याचा फायदा उठविताना दिसत आहेत. पक्षचिन्ह, नेत्यांचे चेहरे असलेले पतंग, साड्या, शर्ट, स्टिकर, पेन यांची स्थानिक बाजारांमध्ये चलती असतानाच जबलपूरमध्ये पंतप्रधान नरेंद्र मोदी आणि काँग्रेस अध्यक्ष राहुल गांधी यांचे चेहरे असलेल्या जॅकेटचा खप वाढत आहे.

बाजारात "मोदी कुर्ता' प्रसिद्ध झाल्यानंतर "राहुल जॅकेट'ही लोकांना आवडले होते. येथील व्यापाऱ्यांनी मात्र मोदी आणि राहुल यांची छायाचित्रे असलेले बंदगळा जॅकेट बाजारात विक्रीसाठी आणले असून, हा नवीन प्रकारही कार्यकर्त्यांच्या पसंतीस उतरत आहे. त्यामुळे भाजपसमर्थक मोदींचा चेहरा असलेले, तर काँग्रेससमर्थक राहुल यांचा चेहरा असलेले जॅकेट खरेदी करत आहेत.