मोदी सरकारने घेतला पहिला महत्वाचा निर्णय

नवी दिल्लीः पंतप्रधान नरेंद्र मोदी यांनी मंत्रिमंडळाच्या पहिल्या बैठकीत हुतात्मा जवानांच्या मुलांना देण्यात येणाऱ्या शिष्यवृत्तीसंदर्भात महत्वपूर्ण निर्णय घेतला आहे. केंद्रीय सशस्त्र दलातील हुतात्मा जवानांच्या मुलांसाठी असलेल्या शिष्यवृत्ती योजनेचा विस्तार केला आहे, या निर्णयाची माहिती मोदींनी ट्विटरवरून दिली आहे.

नक्षलवादी आणि दहशदवादी हल्ल्यात हुतात्मा झालेल्या राज्य पोलिसांच्या मुलांचा शिष्यवृत्ती योजनेत समावेश केला आहे. या योजनेतंर्गत दर महिन्याला देण्यात येणाऱ्या शिष्यवृत्तीच्या रक्कमेमध्येही वाढ केली आहे. मुलांची शिष्यवृत्ती दोन हजारवरुन अडीच हजार आणि मुलींच्या शिष्यवृत्तीत 2250 वरुन तीन हजार रुपये वाढ केली आहे. राष्ट्रीय संरक्षण निधी अंतर्गत पंतप्रधान शिष्यवृत्ती योजनेत बदलांना मंजुरी दिली आहे.

आज (शुक्रवार) दुपारी खातेवाटप जाहीर करण्यात आले आहे. अमित शाह यांच्याकडे गृह मंत्रालयाची तर निर्मला सीतारमन यांच्याकडे अर्थ मंत्रालयाची जबाबदारी सोपवण्यात आली आहे. माजी परराष्ट्र सचिव एस. जयशंकर यांच्याकडे परराष्ट्र मंत्रालयाचा कार्यभार सोपवण्यात आला आहे. लोकसभा निवडणुकीत मिळालेल्या महाविजयानंतर मोदींच्या केंद्रीय मंत्रिमंडळाने गुरुवारी सलग दुसऱ्यांदा शपथ घेतली. त्यात 24 कॅबिनेट मंत्री, 9 स्वतंत्र कारभार सांभाळणारे राज्यमंत्री आणि 24 राज्यमंत्र्यांचा समावेश होता.