कोरेगाव भीमावर मोदींनी मौन सोडावे: मेवानी

नवी दिली : दिल्ली पोलिसांनी नाकारलेली परवानगी झुगारून आमदार जिग्नेश मेवानी यांनी घेतलेल्या "युवा हुंकार रॅली'मुळे आज दिल्लीत संसद मार्गावर तणाव नाट्य रंगले. "भीम आर्मी'चा नेता चंद्रशेखर याच्या सुटकेच्या मागणीसाठी झालेल्या या रॅलीमध्ये शक्तिप्रदर्शनाचा मेवानी यांचा प्रयत्न फारसा यशस्वी झाला नाही; मात्र कोरेगाव भीमावर पंतप्रधानांनी मौन सोडावे, अशी मागणी करून मेवानी यांनी सत्ताधाऱ्यांना डिवचण्याची संधी सोडली नाही. 

"युवा हुंकार रॅली'च्या निमित्ताने मेवानी यांनी पुन्हा एकदा पंतप्रधान नरेंद्र मोदींना लक्ष्य केले. जंतरमंतरनजीक संसद मार्गावर होणाऱ्या या रॅलीला दिल्ली पोलिसांनी सुरक्षेचे कारण देत परवानगी नाकारल्यामुळे समर्थकांमध्ये प्रश्‍नचिन्ह होते. त्याचा परिणाम रॅलीच्या प्रतिसादावर दिसून आला. पोलिसांनी मोठ्या प्रमाणावर बंदोबस्त ठेवला होता. प्रत्यक्षात "जेएनयू'मधील विद्यार्थ्यांसमवेत उपस्थितांची तुरळक संख्या वगळता फारशी गर्दी झालीच नाही. 

पोलिसांकडून रॅलीला झालेल्या विरोधाबद्दल नाराजी व्यक्त करताना मेवानी यांनी सरकारवर हल्ला चढवला. शांततेने आणि लोकशाही पद्धतीने मार्गाने निदर्शने करणाऱ्यांना सरकारकडून लक्ष्य केले जात आहे. लोकप्रतिनिधींची अशी मुस्कटदाबी होत असेल तर जनसामान्यांची अवस्था काय असेल, असा प्रश्‍न त्यांनी केला. 

व्यासपीठावर "जेएनयू'मधील उमर खालीद, कन्हैया कुमार, सेहला रशीद आदी विद्यार्थी संघटनांचे नेते, आसाममधील शेतकरी नेता अखिल गोगोई, प्रशांतभूषण होते. त्यांचीही भाषणे झाली.