नितीश कुमार सातव्यांदा बिहार राज्याच्या मुख्यमंत्रीपदी; शपथविधीचा दिवस ठरला

सकाळ न्यूज नेटवर्क
Sunday, 15 November 2020

जनता दल संयु्क्तचे नेते नितीश कुमार सातव्यांदा बिहार राज्याचा मुख्यमंत्री म्हणून थपथ घेणार आहे

पाटणा- जनता दल संयु्क्तचे नेते नितीश कुमार सातव्यांदा बिहार राज्याचा मुख्यमंत्री म्हणून शपथ घेणार आहे. सोमवारी सकाळी साडे अकरा वाजता त्यांचा शपथविधी सोहळा पार पडेल. बिहार विधानसभा निवडणुकीमध्ये निसटता विजय प्राप्त केल्यानंतर सत्ताधारी एनडीएची आज रविवारी एक महत्त्वाची बैठक आयोजित केली होती. या बैठकीत भाजप-जेडीयू यांच्या नेतृत्वातील एनडीएच्या मुख्य नेतृत्वावर शिक्कामोर्तब झाली.

बैठकीत, भाजपा, जेडीयू यांच्यासहित सहकारी पक्ष हिंदूस्तानी आवाम मोर्चा आणि विकासशील इन्सान पार्टीचे आमदारदेखील सामिल होते. तसेच काही अपक्ष आमदारांनीही एनडीएला समर्थन देण्याची तयारी दाखवली आहे. एनडीएने निवडणुकीच्या आधीच नितीश कुमार यांना आपला मुख्यमंत्री पदाचा उमेदवार म्हणून घोषित केलं होतं. भाजपाने याआधीच स्पष्टपणे सांगितलं होतं की, एनडीएमध्ये कोणत्याही पक्षाला बहुमत मिळो, बिहारच्या मुख्यमंत्री पदी नितीश कुमारच राहतील.

नितीश कुमार यांचा मागचा कार्यकाळ पूर्ण झाल्यावर मुख्यमंत्र्यांनी आधीच राज्यपाल फागू चौहान यांना आपला राजीनामा दिला आहे. राज्यपाल यांनी नितीश कुमार यांनी नवे सरकार बनण्याआधी तात्पुरत्या काळासाठी कार्यवाहक मुख्यमंत्री म्हणून जबाबदारी पार पाडायला सांगितले आहे. निवडणुकीच्या निकालानंतर झालेल्या पहिल्या पत्रकार परिषदेत मुख्यमंत्री पदाच्या प्रश्नावर नितीश कुमार यांनी म्हटलं होतं की, एनडीएच्या आमदारांची बैठक लवकरच बोलावली जाईल. त्या बैठकीत याबाबतचा निर्णय घेतला जाईल. निवडणुकीत भाजपला 74 जागा तर जेडीयूला फक्त 43 जागा मिळाल्या आहेत. 

योगगुरु रामदेव बाबा म्हणतात, मोदींना पुढील 10 ते 20 वर्षे तरी 'नो ऑप्शन...

एनडीएला विधानसभा निवडणुकीत 125 जागा प्राप्त झाल्या आहेत. महागठबंधनने तेजस्वी यादव यांच्या नेतृत्वात एनडीएला ताकदीची टक्कर दिली होती. मतमोजणीपूर्व सर्व अंदाजांमध्ये बिहारमध्ये सत्ताबदलाचे वारे होते. मात्र, अगदी निसटत्या अशा स्वरुपाचा विजय एनडीएला प्राप्त झाला आहे. या निवडणुकीत चिराग पासवान यांच्या नेतृत्वातील लोजपामुळे जेडीयूची मते घटल्याचा अंदाज आहे. लोजपाने एनडीएशी फारकत घेऊन फक्त जेडीयूला विरोध करण्यासाठी आपले उमेदवार उभे केले होते.

 


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: nitish kumar wiil be next cm of bihar