चिदंबरम म्हणाले, कार्तीला मदत करा - इंद्राणी

नवी दिल्ली - माजी अर्थमंत्री पी. चिदंबरम यांनी आम्हाला त्यांचा मुलगा कार्ती यांच्या व्यवसायात ‘मदत’ करण्यास आणि आयएनएक्‍स मीडियाला ‘एफआयपीबी’कडून मंजुरी मिळवून देण्याच्या बदल्यात विदेशातील खात्यामध्ये पैसे भरण्यास सांगितले होते, असा जबाब इंद्राणी मुखर्जी यांनी तपास संस्थांकडे दिला आहे. इंद्राणी मुखर्जी आणि त्यांचे पती पीटर मुखर्जी हे आयएनएक्‍स मीडिया कंपनीचे प्रमुख आहेत.

इंद्राणी यांचे निवदेन आर्थिक गैरव्यवहारविरोधी कायद्यांतर्गत नोंदविण्यात आले आहे. आपण चिदंबरम यांना दिल्लीतील नॉर्थ ब्लॉकमध्ये त्यांच्या तेव्हाच्या कार्यालयात भेटलो होतो, असेही इंद्राणी यांनी जबाबात म्हटले आहे. इंद्राणी आणि पीटर यांच्यावर त्यांची मुलगी शीना बोरा हिची हत्या केल्याचा आरोप असून, दोघेही सध्या तुरुंगातच आहेत. पीटर मुखर्जी यांनीही ‘ईडी’ला दिलेल्या त्यांच्या जबाबात आयएनएक्‍सच्या व्यवहारासंदर्भात चिदंबरम यांची दोन ते तीन वेळा भेट घेतल्याचे कबूल केले आहे. तसेच, कार्ती यांनाही दिल्लीतील हयात हॉटेलमध्ये भेटल्याचे त्यांनी सांगितले.