हिंसा करणारे लोक राष्ट्रवादी नाहीत- उपराष्ट्रपती नायडू 

नवी दिल्ली : कोणाला ठेचून मारण्याच्या घटनांमध्ये आणि वंशद्वेषी घटनांमध्ये सहभागी असणारे लोक स्वत:ला राष्ट्रवादी म्हणवून घेऊ शकत नाहीत, असे उपराष्ट्रपती वेंकय्या नायडू आज म्हणाले. अशा घटना रोखण्यासाठी केवळ कायद्याचा मार्ग पुरेसा नसून सामाजिक वर्तणूक बदलणेही तितकेच आवश्‍यक आहे, असे मतही त्यांनी व्यक्त केले. 

उपराष्ट्रपती नायडू यांनी आज "पीटीआय'ला दिलेल्या मुलाखतीदरम्यान सामाजिक हिंसाचाराच्या घटनांबाबत चिंता व्यक्त केली. अशा घटनांचे राजकारण केले जात असल्याबद्दलही त्यांनी संताप व्यक्त केला.

"सामाजिक वागणूक बदलणे गरजेचे आहे. ठेचून मारण्याच्या घटना कोणा राजकीय पक्षामुळे होत नाहीत. तुम्ही यासाठी राजकीय पक्षांना जबाबदार धरले तर मूळ उद्देशच नष्ट होतो. सध्या हेच होत आहे. जमावाकडून मारहाण आणि वंशद्वेषाच्या घटना हा नवा प्रकार नसून पूर्वीही अशा घटना होत होत्या. त्यामुळेच समाजामध्ये बदल आवश्‍यक ठरतो. तुम्ही दुसऱ्या व्यक्तीला मारून टाकत असाल तर स्वत:ला राष्ट्रवादी कसे म्हणवून घेऊ शकता? धर्म, जात, वर्ण आणि लिंग या आधारावर तुम्ही भेदाभेद करत आहात, हे राष्ट्रवादाच्या विरोधी आहे.

"राष्ट्रवाद', "भारत माता की जय' या शब्दांना व्यापक अर्थ आहे,'' असे नायडू म्हणाले. समाजातील सगळेच गैरप्रकार केवळ कायद्याच्या साह्याने बदलता येणार नाहीत, समाजालाही स्वत:ला बदलावे लागेल, अशी भूमिका त्यांनी मांडली.