मोदींच्या विश्वासू अधिकाऱ्यावर युपी भाजपत महत्वाची जबाबदारी!

लखनऊ : माजी आयएएस अधिकारी ए. के. शर्मा हे पतंप्रधान नरेंद्र मोदी यांचे निकटवर्तीय मानले जातात. शर्मा यांच्यावर उत्तर प्रदेश भाजपमध्ये महत्वाची जबाबदारी सोपवण्यात आली आहे. त्यांची युपी भाजपच्या उपाध्यक्षपदी नियुक्ती करण्यात आली आहे. युपीमध्ये पुढील वर्षी विधानसभा निवडणूक होणार आहे. (PM aide A K Sharma Made UP BJP VP after buzz over role as Minister)

गेल्या काही आठवड्यांपासून शर्मा यांना उत्तर प्रदेश सरकारमध्ये मंत्रीपद मिळण्याबाबत चर्चा सुरु होती. या वर्षाच्या सुरुवातीला त्यांना पंतप्रधान नरेंद्र मोदी यांचा मतदारसंघ वाराणसीत कोरोनाच्या स्थितीवर नियंत्रण आणण्यासाठी नियुक्ती करण्यात आली होती.

युपी सरकारमध्ये नेतृत्वबदल होणार नाही - भाजप

उत्तर प्रदेशचे मुख्यमंत्री योगी आदित्यनाथ हे कोरोनाची स्थिती हाताळण्यात अपयशी ठरल्याचं बोललं जात असून त्यामुळे मुख्यमंत्री योगी अडचणीत आले आहेत. यापार्श्वभूमीवर उत्तर प्रदेशात नेतृत्वबदल होणार असल्याच्या चर्चा होत्या. यावर भाजपनं असा कुठलाही विचार नसल्याचं स्पष्ट केलं आहे.

योगींच्या नेतृत्वाखाली होतील विधानसभा निवडणुका

पुढील वर्षी होणाऱ्या उत्तर प्रदेशातील विधानसभा निवडणुका मुख्यमंत्री योगी आदित्यनाथ यांच्या आणि भाजपाध्यक्ष स्वतंत्र देव सिंह यांच्या नेतृत्वाखाली लढणार असल्याचं सुत्रांकडून कळतं. दरम्यान, जूनच्या सुरुवातीला लखनऊमध्ये भाजपच्या राष्ट्रीय नेत्यांनी दोन दिवसांची आढावा बैठक घेतली होती.