श्रीनगर : दहशतवाद्यांकडून पोलीस कर्मचाऱ्याची हत्या, 7 वर्षांची मुलगी जखमी

श्रीनगर : जम्मू-काश्मीरमधील (Jammu Kashimir) श्रीनगरमधील सौरा भागात मंगळवारी दहशतवाद्यांनी एका पोलीस कॉन्स्टेबलची गोळ्या झाडून हत्या केली. तर या हल्ल्यात पोलीस कर्मचाऱ्याची 7 वर्षांची मुलगी जखमी झाली आहे. श्रीनगर जिल्ह्यातील सुरा भागात हा हल्ला झाला. सैफुल्लाह कादरी असे या घटनेत मृत्यू झालेल्या पोलीस हवालदाराचे नाव आहे. जम्मू-काश्मीर पोलिसांनी या घटनेला दुजोरा दिला आहे. (J & K Policeman Shot Dead By Terrorist )

दहशतवाद्यांनी हवालदार सैफुल्लाह कादरी यांच्या सौरा भागात असलेल्या घरावर गोळीबार केला. यामध्ये कादरी हे गंभीर जखमी झाले. त्यांना तत्काळ उपचारांसाठी रूग्णालयात नेण्यात आले. परंतु, तेथे त्यांचा मृत्यू झाला. या हल्ल्यामध्ये कादरी यांची सात वर्षांची मुलगीदेखील जखमी झाली असून, तिची प्रकृती धोक्याबाहेर असल्याचे सांगण्यात येत आहे.

गेल्या काही महिन्यांत दहशतवाद्यांनी स्थानिक सैनिक, पोलीस आणि अल्पसंख्याक समुदायातील लोकांवर हल्ले वाढवले आहेत. एवढेच नाही तर परराज्यातून आलेल्या लोकांवर हल्ले करण्याचे प्रमाणही वाढले आहे. ऑपरेशन ऑल आऊटमुळे सुरक्षा दलाच्या रोषामुळे दहशतवादी असे हल्ले करत असून त्यामुळे दहशत निर्माण होत असल्याचे मानले जात आहे. काश्मिरी पंडितांना परत आणण्याचे प्रयत्न, पंचायत निवडणुकीत लोकांचा सहभागही दहशतवाद्यांकडून धोक्यात आला आहे.