गडकरींची इच्छा असेल, तर...- मोहन भागवत

देहरादून: गडकरींच्या मनात काही असेल काही इच्छा असेल तर ते आधी मला सांगतील असे राष्ट्रीय स्वयंसेवक संघाचे प्रमुख मोहन भागवत यांनी म्हटले आहे. गेल्या काही दिवसांपासून केंद्रीय मंत्री नितीन गडकरी त्यांच्या विधानांमुळे चर्चेत आहेत. यावर भागवत यांनी भाष्य केलं आहे. षडयंत्र रचणं हा गडकरींचा स्वभाव नाही, असेही भागवत यांनी म्हटले आहे. ते देहरादूनमध्ये बोलत होते. 

गडकरी त्यांच्या वक्तव्यांमधून अप्रत्यक्षपणे पक्ष नेतृत्त्वावर निशाणा साझत असल्याची राजकीय वर्तुळात आहे. यावरच बोलताना भागवत म्हणाले की, गडकरींचा स्वभाव तसा नाही. 'नितीन गडकरींचा स्वभाव अतिशय सौम्य आहे. कटकारस्थान करणं हा त्यांचा स्वभाव नाही. असेही भागवत यावेळी म्हणाले.

मध्य प्रदेश, राजस्थान आणि छत्तीसगडमधील भाजपाच्या पराभवानंतर नितीन गडकरींनी केलेल्या विधानानं अनेकांच्या भुवया उंचावल्या होत्या. पराभवाची जबाबदारी नेतृत्त्वाची असते. तुमचे खासदार काम करत नसेल, तर त्यासाठी तुम्ही जबाबदार असता, अशा आशयाचं विधान गडकरींनी केलं होतं. यानंतर काही दिवसांपूर्वीच, जो आपले घर सांभाळू शकत नाही, तो देश काय सांभाळणार? असा सवाल त्यांनी विचारला होता. त्यामुळे गडकरी अप्रत्यक्षपणे मोदींवर निशाणा साधत असल्याची चर्चा होती.