'कानून बनाओ, मंदिर बनाओ'; शिवसेना राममंदिरासाठी पुन्हा आग्रही

अयोध्या : अयोध्येतील राममंदिराच्या उभारणीवरून शिवसेनेने पुन्हा एकदा आक्रमक भूमिका घेतली आहे. या ठिकाणी भव्य राममंदिराच्या उभारणीसाठी केंद्र सरकारने कायदा करावा, पंतप्रधान नरेंद्र मोदी यांच्याकडे धैर्य असून, त्यांना कोणीही रोखू शकत नाही, असे मत शिवसेना पक्षप्रमुख उद्धव ठाकरे यांनी आज मांडले. 'कानून बनाओ, मंदिर बनाओ'चा नारा देत उद्धव यांनी पुन्हा एकदा कडवट हिंदुत्वाचा राग आळवला आहे. 

उद्धव यांनी आज अठरा नवनिर्वाचित खासदारांसमवेत अयोध्येला भेट देत रामलल्ला मंदिरामध्ये पूजाअर्चना केली. या वेळी युवासेनेचे प्रमुख आदित्य ठाकरे हे देखील उपस्थित होते. लोकसभा निवडणुकीच्या आधीच उद्धव ठाकरे यांनी अयोध्येला भेट देत राममंदिराच्या उभारणीचा मुद्दा उपस्थित केला होता. आता निवडणूक संपल्यानंतर आमच्या पक्षप्रमुखांनी हे वचन पाळले असल्याचे शिवसेनेने म्हटले आहे.

येथे पत्रकार परिषदेत बोलताना उद्धव म्हणाले की, "मागील अनेक वर्षांपासून हा खटला न्यायालयामध्ये आहे, पंतप्रधान नरेंद्र मोदी यांच्याकडे धैर्य असून सरकारने आता जरी राम मंदिराच्या उभारणीचा निर्णय घेतला तरीसुद्धा त्यांना कोणीही रोखू शकत नाही. केवळ शिवसेनाच नाही तर जगातील हिंदू हे मोदींसोबत आहेत.'' 

उद्धव म्हणाले 
- राममंदिरासाठी सरकारने अध्यादेश आणावा 
- मंदिर तातडीने उभारले जावे ही हिंदूंची इच्छा 
- राममंदिर हा राजकारणाचा नाहीतर श्रद्धेचा विषय 
- हिंदुत्वाच्या बळकटीलाच शिवसेना, भाजपचे प्राधान्य 
- मोदींना सत्ता मिळाली, त्यांनी जनतेचा आदर ठेवावा 
- चांगल्या कामासाठी विचारही चांगले हवेत.