Loksabha 2019 : शिवसेना गोव्यात स्वतंत्र लढणार; दोन्ही उमेदवार जाहीर

पणजी : शिवसेनेने आज लोकसभेची निवडणूक स्वतंत्रपणे लढण्याचे जाहीर करत गोव्यातील दोन्ही जागांवरील उमेदवारांचीही घोषणा केले. शिवसेनेचे गोवा संपर्क नेते खासदार संजय राऊत यांनी उत्तर गोवा लोकसभा मतदारसंघातून शिवसेनेचे राज्यप्रमुख जितेश कामत तर दक्षिण गोवा लोकसभा मतदारसंघातून राज्य उपाध्यक्षा राखी प्रभुदेसाई नाईक या  निवडणूक लढवतील असे जाहीर केले.

शिवेसेनेने 2017 मधील विधानसभा निवडणुकीत गोवा सुरक्षा मंच या पक्षाशी युती केली होती. आता त्या पक्षाने शिवसेनेला विश्वासात न घेता तिन्ही विधानसभा पोट निवडणुकीसाठीचे उमेदवार जाहीर केले आहेत.

त्याबाबत आज राऊत यांनी सांगितले, की विधानसभा पोट निवडणुकीत मांद्रे मतदारसंघातून शिवसेना गोवा सुरक्षा मंचासोबत युतीने लढण्यास इच्छूक आहे. त्यासाठी आवश्यक ती चर्चा गोवा सुरक्षा मंचाचे पक्ष प्रमुख सुभाष वेलिंगकर यांच्याशी केली जाईल. गोवा सुरक्षा मंचाने अद्याप लोकसभा निवडणूक लढवण्याविषयी कोणताही निर्णय घेतलेला नाही.

राऊत म्हणाले, मांद्रे मतदारसंघातील विधानसभा पोट निवडणुकीसाठी शिवसेनेकडे उमेदवार तयार आहे. त्या नावाची घोषणा वेलिंगकर यांच्या भेटीनंतरच केली जाईल.