सावंत सरकारला पाठिंबा देण्यावरून मतभेद तीव्र

पणजी : गोवा विधानसभेत डॉ. प्रमोद सावंत सरकारने विश्‍वासदर्शक ठराव जिंकला असला तरी यानिमित्ताने सरकारला पाठिंबा देण्यावरून महाराष्ट्रवादी गोमंतक पक्षात फूट पडल्याचे दिसून आले. पक्षाचे आमदार दीपक पाऊसकर आणि सार्वजनिक बांधकाममंत्री सुदिन ढवळीकर यांनी परस्परविरोधी माहिती देत या सारेकाही आलबेल नसल्याचे संकेत दिले आहेत. 

महाराष्ट्रवादी गोमंतक पक्षाचे तीन आमदार आहेत. त्यापैकी मनोहर आजगावकर आणि पाऊसकर हे भाजपमध्ये जाणार अशी चर्चा होती. मात्र, भाजपने घटक पक्ष अस्थिर करणार नाही, अशी भूमिका घेत ही शक्‍यता फेटाळली होती. ढवळीकर हे मुख्यमंत्रिपदासाठी अडून बसले होते. सरकारला पाठिंबा देणारे पक्षाचे पत्र त्यांच्याकडेच होते. ते त्या पत्रासह गायब झाल्याने शपथविधी लांबला आणि अखेर तो उत्तररात्री करावा लागला होता.

पाऊसकर यांनीच ही बाब आज पत्रकारांशी बोलताना उघड केली. ते म्हणाले, मगोच्या केंद्रीय समितीने घेतलेला ठराव घेऊन ढवळीकर निघून गेले. ते बराच वेळ कुठे आहेत हे समजून आले नाही. तोवर शपथविधीची वेळ झाली आणि पक्षाला तीन मंत्रिपदे मिळालीच नाही.

मात्र, ढवळीकर यांनी सांगितले, की मगोच्या केंद्रीय समितीने तीन मंत्रिपदे व महामंडळाची तीन अध्यक्षपदे मिळावीत, असा ठराव घेतला खरा मात्र त्यावर दोन आमदारांच्या स्वाक्षऱ्या केल्याच नाहीत. त्यामुळे तो ठराव भाजपच्या नेत्यांकडे देण्याचा प्रश्‍नच येत नव्हता. ते दोन आमदारच त्या ठिकाणी नव्हते.