ब्रिटनच्या पंतप्रधान थेरेसा मे देणार राजीनामा

लंडन : ब्रिटनच्या पंतप्रधान थेरेसा मे आपल्या पदाचा राजीनामा देणार आहेत. याबाबतची घोषणा 'डाउनिंग स्ट्रीट' येथील पीएम हाऊस येथे त्यांनी आज (शुक्रवार) केली. ब्रेक्झिट करारात अपयशी झाल्याबद्दल त्यांनी माफीही मागितली आहे. तसेच 7 जूनला 'कंझर्वेटिव्ह पक्षा'चे अध्यक्षपदही सोडणार असल्याचे त्यांनी सांगितले. 

युरोपीय संघातून ब्रिटनला बाहेर करण्यासाठी आपल्या पक्षाची समजूत काढण्यात थेरेसा मे अपयशी झाल्याचा आरोप त्यांच्यावर करण्यात आला होता. तसेच संसदेतही त्यांची ब्रेक्झिट योजना अनेकवेळा नाकारण्यात आली होती. त्यानंतर आता अखेर थेरेसा मे यांनी पंतप्रधानपदाचा राजीनामा देण्याचा निर्णय घेतला. 

दरम्यान, थेरेसा मे यांनी राजीनामा दिल्यानंतर त्या या पदावर काळजीवाहू पंतप्रधान म्हणून राहू शकतात, अशी माहिती मिळत आहे. 

पंतप्रधान निवडण्याची प्रक्रिया पुढील आठवड्यात

थेरेसा यांनी प्रसिद्ध केलेल्या निवेदनात म्हटले, की "माझ्यासाठी ही फार मोठी दु:खदायक घटना आहे. ब्रेक्झिट करार यशस्वी करण्यात मी कमी पडले. त्यामुळे मी पंतप्रधानपदाचा राजीनामा देणार असून, पुढील पंतप्रधान निवडण्याची प्रक्रिया येत्या आठवड्यात सुरू होईल."