पश्‍चिम जपानला 'जेबी'चा तडाखा ; 12 जण मृत्युमुखी

टोकिओ : जेबी चक्रीवादळाने पश्‍चिम जपानला जोरदार तडाखा दिला असून, त्यात सुमारे 12 जण मृत्युमुखी पडल्याची माहिती स्थानिक माध्यमांनी दिली आहे. मागील 25 वर्षांत जपानला सामना करावा लागलेले हे सर्वांत भीषण चक्रीवादळ ठरले आहे. 

जपानच्या पश्‍चिमेकडील भागाला जेबी चक्रीवादळाचा मोठा फटका बसला असून, या ठिकाणी मोठ्या प्रमाणात नुकसान झाले असल्याचे सांगण्यात आले. पश्‍चिम जपानमधील क्‍योटो आणि ओसाका शहरांमध्ये "जेबी'मुळे मोठे नुकसान झाले आहे. विमान, रेल्वे आणि फेरी सेवा बंद करण्यात आली असून, ओसाका आंतरराष्ट्रीय विमानतळावर हजारो प्रवासी अडकून पडले आहेत. विविध ठिकाणी अडकून पडलेल्या नागरिकांची सुटका करण्यासाठी मदतकार्य सुरू असल्याची माहिती माध्यमांनी दिली.

चक्रीवादळाच्या पार्श्वभूमीवर पूर आणि दरडी कोसळण्याची शक्‍यता असल्याचा इशारा सरकारकडून देण्यात आला असून, नागरिकांनी सावध राहण्याची सूचना देण्यात आली आहे. 

"जेबी'मुळे तीनशे जण जखमी झाले असून, सुमारे 12 लाख नागरिकांना सुरक्षितस्थळी हलविण्याचा सूचना देण्यात आल्या असल्याचे सरकारी प्रवक्‍त्याने स्पष्ट केले. चक्रीवादळाच्या पार्श्वभूमीवर शाळा, कंपन्या बंद ठेवण्यात आल्या आहेत. अनेक ठिकाणी वीजपुरवठा खंडित झाला असल्याचेही समजते.