ऑस्ट्रेलियात वटपौर्णिमा उत्साहात साजरी...

सिडनी, ऑस्ट्रेलिया (प्रिया पाटील-भोसले): वटपौर्णिमा म्हणजे सात जन्म तोच पती मिळण्यासाठी महिलांनी करायचे व्रत. हे व्रत केल्यावर आपल्या पतीला जास्त आयुष्य मिळते आणि पुढच्या सात जन्मासाठी आपल्याला तोच पती मिळतो अशी धारणा आपल्या समाजात मागच्या बराच काळापासून रुढ आहे.  या दिवशी वडाच्या वृक्षाला अनन्यसाधारण महत्व आहे. वड हा वृक्ष अनेक वर्ष आयुष्य असणारा भक्कम वृक्ष म्हणून ओळखला जातो. मात्र यामागे काही शास्त्रीय कारणेही सांगितली जातात. वडाच्या झाडामध्ये ऑक्सिजनचे प्रमाण जास्त असल्याने स्त्रियांनी या झाडाच्या सानिध्यात राहणे चांगले असते. त्यामुळे हे व्रत करणे अतिशय उपयुक्त ठरते. याबरोबरच एकमेकींना वाण दिल्याने आपल्याकडून दान केले जाते असेही म्हणतात. वडाचे झाड ज्याप्रमाणे अनेक वर्षांसाठी जगते त्याचप्रमाणे आपला पतीही दिर्घायुषी व्हावा म्हणून त्याला सुताने बांधून ठेवल्यास ते वाचते असाही समज आहे.

सातासमुद्रापार भारतीय नागरिकांचे वास्तव्य असून, विविध देशांमध्ये वटपौर्णिमा साजरी केली जाते. सिडनी येथील मुरुगन मंदिराच्या परिसरात वटपौर्णिमा साजरी करण्यात आली. यावेळी महिला मोठ्या उत्साहात सहभागी झाल्या होत्या. यासाठी भूमिका म्हात्रे आणि फ्रिदा सांवत यांनी पुढाकार घेतला होता.