भोकणी शिवारात शेतकऱ्यांवर लुटारूंचे हल्ले ; दगडफेक करून लुट

जळगाव, :- धरणगाव तालुक्‍यातील भोकणी शिवारातील शेतात रखवालदारी करणाऱ्या सालदार कुटुंबीयांवर हल्ला चढवून शेतातील साहित्य लांबवण्याच्या घटना वाढल्या आहेत. गेल्या आठवड्यात एका मागून एक दोन घटना घडल्या असून हल्ला झाल्यावर एका घटनेत तर, पाळधी औटपोस्टला फोनही लावण्यात आला मात्र, पोलीस पोचलेच नाही. परिणामी शेतीतील पंपासह मिळेल ते, साहित्य घेऊन चोरटे पसार झाले. 

गिरणानदी काठावर बांभोरी नंतर भोकणी (ता.धरणगाव) गाव आहे, गावातील लोकसंख्या मर्यादित असली तरी, शेतशिवार मोठे आणि सधन शेतकऱ्यांचा परिसर आहे. गेल्या शनिवारी भोकणी शिवारातील डॉ.नितीन पाटील यांच्या शेतात आठ ते दहा चोरट्यांनी हल्ला चढवून शेतातून विद्युत पंप आई इतर साहित्य घेऊन पोबारा केला. दोन दिवस उलटत नाही तोवर याच शिवारातील जाखेटे यांच्या शेतावर पहाटे काही चोरट्यांनी हल्ला केला. शेतातील जनरेटर आणि इतर शेती उपयोगी साहित्य उचलून नेताना सालदारांनी हटकल्यावर चोरट्यांच्या एकागटाने त्यांच्यावर हल्ला चढवून तुफान दगडफेक करीत चोरी करून पोबारा केला. चोरी होत असताना येथील सालदारांनी पाळधी औटपोस्टला फोनही लावला होता. मात्र, येथे हजर हवालदाराने गाडी राऊंडवर गेली आहे. निरोप दिला असून तिकडेच येतील असे सांगून फोन ठेवला. दिवस उजाडल्यानंतरही पोलिसांची गाडी पोहचु शकली नाही. हीच परिस्थिती बांभोरी, पथराड, पाळधी या शिवारातील गावातील शेतांमध्ये असून शेतात आता सालदार रात्री थांबण्यासही तयार नसल्याचे एका शेतकऱ्याने सांगितले.