‘शेतकऱ्यांचे वीज कनेक्‍शन कापणे बंद करा’

जळगाव : महावितरणतर्फे शेतीपंपाचे वीज कनेक्‍शन बिल न भरल्‍यामुळे कापले जात आहे. अशा पद्धतीने बेकायदेशीर कनेक्‍शन कट करणे बंद करावे, अन्‍यथा सर्व शेतकरी मिळून आंदोलन उभारून मुख्‍य लाइन कापतील, असा इशारा शरद जोशी विचारमंच शेतकरी संघटनेचे प्रदेशाध्‍यक्ष विठ्ठल पवार यांनी गुरुवारी (ता. ३) पत्रकार परिषदेत दिला.

काबरा फाउंडेशन येथे आयोजित पत्रकार परिषदेस प्रदेश सचिव डॉ. महेंद्र काबरा, जिल्‍हाध्‍यक्ष अजय जाजू उपस्‍थित होते. पवार यांनी सांगितले, की महावितरण कट करत असलेले कनेक्‍शन हे अन्न‍ सुरक्षा कायद्याच्‍या तरतुदीच्या कलम ३१ व परिशिष्ट ३ चा भंग करणारे आहे. वीज वितरण कंपनीच्‍या बेकायदा कृतीमुळे सिंचनाअभावी पिके नष्‍ट होत आहेत. यामुळे शेतकरी आत्‍महत्‍या करतो. यामुळे कनेक्‍शन कापण्याची कारवाई बंद करावी, अन्‍यथा शरद जोशी विचारमंच शेतकरी संघटनेकडून मोठे आंदोलन उभे केले जाईल, असा इशारा पवार यांनी दिला.