जिल्ह्यात 70 टक्के रोपे जगल्याचा दावा 

जळगाव : गतवर्षी 33 कोटी वृक्ष लागवड मोहिमेत 80 टक्के रोपे जगली असून, त्यांची वाढही होत असल्याची माहिती जळगाव वनविभागाचे उपवनसरंक्षक दिगंबर पगार यांनी दिली. गतवर्षी पाऊसही चांगला झाल्याने रोपांची वाढ चांगली झाली आहे. 

राज्य शासनातर्फे दरवर्षी वृक्ष लागवड मोहीम राबविली जाते. गतवर्षी 33 कोटी वृक्ष लागवड मोहीम राबविली गेली. यात वनविभाग 41.60 लाख, सामाजिक वनीकरण 20 लाख, ग्रामपंचायत 36.77 लाख, इतर शासकीय यंत्रणा 17.71 लाख, जलसंपदा विभाग 1 लाख 31 हजार 825, एमआयडीसी 30 हजार, शिक्षण विभाग 1 लाख 30 हजार 372, ऊर्जा विभाग 4530 व इतर सर्व विभाग मिळून जिल्ह्याला एक कोटी 17 लाख 19 हजार 486 वृक्ष लागवडीचे उद्दिष्ट देण्यात आले होते. जिल्ह्यातील वनविभागाच्या रोपवाटिकांमध्ये 60.73 लाख, तर सामाजिक वनीकरण विभागाच्या रोपवाटिंकांमध्ये 61.92 लाख, अशी सुमारे एक कोटी 22 लाख 65 हजार रोपांची उपलब्धता करण्यात आली होती. त्यातील 70 ते 80 टक्के रोपे जगली. वीस ते तीस टक्के रोपे काही कारणांनी जगली नाहीत. त्याजागी यंदा नवीन वृक्षारोपण केले जाणार आहे. यंदा केवळ पारोळा तालुक्‍यात वृक्षारोपण करावयाचे आहे. जळगाव व यावल वनविभागात विविध ठिकाणी, नदीकाठी, रस्त्यांच्या दुतर्फा, मोकळ्या टेकड्यांवर वृक्ष लागवड करण्यात आली होती.