बनावट कागदपत्र तयार करून हमालीचा ठेका 

पाचोरा (जळगाव) : हमाली कामाचे बनावट कागदपत्र तयार करत शासनाची दिशाभूल करून ठेका घेतल्याप्रकरणी कुऱ्हाड (ता. पाचोरा) येथील दक्ष हमाल मापाडी सहकारी संस्थेविरुद्ध पाचोरा पोलिसात गुन्हा दाखल झाला आहे. असे असले तरी चौकशी व कारवाई गुलदस्त्यात असल्याने या प्रकरणात महसूलच्या वरिष्ठ अधिकाऱ्यांचा दबाव व राजकीय हस्तक्षेप होत असल्याचा सूर उमटत आहे. जिल्हाधिकारी अभिजीत राऊत यांनी याप्रकरणी चौकशी करून न्याय द्यावा, अशी मागणी तक्रारदार मानसिंग राजपूत व अरुण पाटील यांनी केली आहे. 
कुऱ्हाड येथील दक्ष हमाल मापाडी सहकारी संस्थेचे चेअरमन जगदिश तेली यांनी सदरची संस्था जुनी आहे तसेच भडगाव, चाळीसगाव व पाचोरा तालुक्यातील इतर स्पर्धक संस्थांनी ठेक्या संदर्भात संस्थेला ना हरकत प्रमाणपत्र दिले आहे, असे भासवले. यासंदर्भातील बनावट कागदपत्र तयार करून शासकीय धान्य गोदामातील रेशनिंग मालाच्या गोण्या गोदामात टाकणे व ग्रामीण भागात वितरणासाठी गाड्यांमध्ये भरणे यासाठीचा ठेका घेतला. 

नोंदणीकृत संस्‍थेलाच ठेका पण
एक वर्ष अनुभव असलेल्या नोंदणीकृत संस्थेलाच अशा प्रकारचा ठेका दिला जातो. परंतु दक्ष हमाल मापाडी संस्था काही महिन्यांपूर्वी नोंदणीकृत झालेली असताना सदरची संस्था एक वर्षापासूनची आहे असा कृषी उत्पन्न बाजार समितीचा व चार्टड अकाऊंट यांचा बनावट दाखला सादर करून सदरचा ठेका या संस्थेने मिळवला. 

पदाधिकारी हमाली संस्‍थेचे संचालक
दक्ष संस्थेत हमालीचा व्यवसाय करणारे जे संचालक दाखवले गेले ते वास्तवात हमालीचा व्यवसाय न करता स्थानिक स्वराज्य संस्थांचे आजी-माजी पदाधिकारी, धान्य दुकानदार व इतर नोकऱ्या करणारे आहेत. याचीही सखोल चौकशी झाल्यास यातून मोठे रॅकेट उघडकीस येण्याची शक्यता असून याप्रकरणी संत जनार्दन हमाल मापाडी संस्थेचे चेअरमन मानसिंग राजपूत यांनी पाचोरा पोलीस ठाण्यात जगदीश तेली यांच्याविरोधात फसवणूक, हेराफेरी प्रकरणी तक्रार दिल्यावरून गुन्हा दाखल झाला असला तरी सखोल चौकशी व कार्यवाही होत नसल्याने त्यांनी आता वरिष्ठांकडे न्याय मागण्याची भूमिका घेतली आहे.

संपादन ः राजेश सोनवणे