रत्नागिरी जिल्ह्यात 14 नवीन कोरोना रूग्ण

रत्नागिरी - जिल्ह्यात गेल्या चोवीस तासात 14 कोरोनाबाधित सापडले आहेत तर 28 जणांनी कोरोनावर मात केली आहे. एकाही रुग्णाचा आज मृत्यू झालेला नाही. कोरोनाबाधितांचा आकडा वाढत असल्यामुळे जिल्ह्यातील उपचाराखालील रुग्णांची संख्या 144 वर पोचली आहे. तालुक्‍यातील पावस परिसरातील एका शाळेत हजर झालेले शिक्षक पॉझिटिव्ह निघाल्याने पालकांची चिंता वाढली आहे. 

जिल्ह्यात कोरोनाचा उद्रेक झाला नसला तरी दिवसेंदिवस कोरोनाचे रुग्ण वाढत आहेत. आज सायंकाळी प्राप्त झालेल्या अहवालानुसार 171 जणांची कोरोना चाचणी करण्यात आली. त्यामध्ये 14 कोरोना बाधित रुग्ण सापडले. 157 जणांना अहवाल निगेटिव्ह आला. यामध्ये आरटीपीसीआर 11 तर ऍन्टीजेन चाचणीत 3 रुग्ण आढळले. यामध्ये सर्वात जास्त रत्नागिरी तालुक्‍यात 8 रुग्ण आहेत,

खेड 2, गुहागर 2, संमेश्‍वर-देवरूख 2 रुग्ण. जिल्ह्यात आतापर्यंत 8 हजार 864 पॉझिटिव्ह रुग्ण असून 55 हजार 377 जणांचा अहवाल निगेटिव्ह आहेत. दिवसभरात 28 रुग्ण बरे झाले असून 8 हजार 351 जण कोरोनामुक्त झाले आहेत. जिल्ह्याचा रुग्ण बरे होण्याचा दर 94.21 टक्के आहे. मागील चोवीस तासात जिल्ह्यात कोरोनाने एकाही रुग्णाचा मृत्यू झालेला नाही. एकूण कोरोना बळींची संख्या 321 असून मृत्यूदर 3.62 आहे. जिल्ह्यातील विविध कोरोना सेंटरमध्ये 144 रुग्ण उपचार घेत आहेत. 

पावस येथील एका शाळेत हजर झालेले शिक्षक पॉझिटिव्ह निघाल्याने आरोग्य यंत्रणेला पुन्हा काम लागले आहे. परजिल्ह्यातून आलेल्या शिक्षकाने कोरोना चाचणी न करता शाळेत हजेरी लावली. अचानक तब्येत बिघडल्याने त्यांची कोरोनाची चाचणी केली असता चाचणी पॉझिटिव्ह आल्याने पालकांची झोप उडाली आहे. 

* एकूण बाधित रुग्ण - 8864 
* बरे झालेले रुग्ण - 8351 
* एकूण निगेटिव्ह- 55377 
* एकूण मृतांची संख्या- 321