कृषी कार्यालय भाड्याच्या इमारतीत ; २२ वर्षांत बदलले २५ कृषी अधिकारी!

मंडणगड (रत्नागिरी) : मंडणगड तालुक्‍यास पूर्णवेळ तालुका कृषी अधिकारी हे पद मंजूर असतानाही गेल्या २२ वर्षात म्हणजेच १९९८ ते २०२० या कालावधीत तालुक्‍यात एकूण २५ तालुका कृषी अधिकारी मिळाले आहेत. यातील १५ अधिकाऱ्यांनी प्रभारी या नात्याने तालुका कृषी अधिकारी पदाचे काम पाहिले आहे. केवळ ४ अधिकाऱ्यांना पूर्णवेळ कृषी अधिकारी म्हणून काम करता आले.

२०१८ ते २०२० या दोन वर्षांचे कालावधी ९ वेगवेगळ्या अधिकाऱ्यांची या पदावर विभागाने नियुक्ती केल्याने केवळ रजेच्या कालावधीतील जुळवा जुळवा करण्याकरिता हे पद निर्माण केले आहे का, असा प्रश्न निर्माण होतो आहे.
तालुका कृषी अधिकारी ते पहारेकरी पदाचा विचार करता, आजही या कार्यालयात एकूण २४ पद रिक्त आहेत. यामध्ये तालुका कृषी अधिकारी १, कृषी अधिकारी २, वरिष्ठ लिपिक १, लिपिक ३, अनुरेखक ४, कृषि पर्यवेक्षक ४ , कृषि सहायक ६, वाहनचालक १, शिपाई १, पहारेकरी १ अशी चौवीस पदे रिक्त आहेत. कार्यालयात एकूण मंजूर पदे ५० असून यातील केवळ २६ पदे भरलेली आहेत. २४ पदे रिक्त आहेत. रिक्त पदांचा कार्यभार कार्यालयात उपलब्ध कर्मचाऱ्यांनाच सांभाळावा लागत असल्याने अधिक कामाचा परिणाम कर्मचाऱ्यांच्या नैमित्तिक कामकाजावर होतो.  

हेही वाचा -  बापरे! चक्क पोलीसाच्या घरात आढळला दारु साठा

तब्बल १२ पदे रिक्त

गेल्या ९ महिन्यांपासून प्रोबेशनवरील अधिकारी प्रभारी तालुका कृषि अधिकारी कार्यालयाचे कामकाज चालवत आहेत. त्यामुळे तालुका कृषी कार्यालयाकडून शेतकऱ्यांना अपेक्षित मार्गदर्शन मिळत नसल्याची गंभीर बाब पुढे आली आहे. कृषी अधिकारी गट ब व क  ही पदे २०१४ पासून तर कृषी पर्यवेक्षक हे पद २००९ पासून रिक्त आहे. मंडणगड मुख्यालय असणारी कार्यालयातील तब्बल १२ पदे रिक्त असल्याची बाबही स्पष्ट झाली आहे.

कृषी विकासाचे मॉडेल कधी?

राज्य शासनाच्या तालुका कृषी कार्यालयाचा कर्मचारी भरतीचा अनुशेष वर्षानुवर्षे मोकळाच राहिल्याने कार्यालयाचे माध्यमातून कृषी विकासाचे मॉडेल सादर करणाऱ्या प्रयोगांची तालुक्‍यास अद्याप प्रतीक्षा आहे.

कार्यालय भाड्याच्या इमारतीत..

तालुका कृषी कार्यालयास आजही स्वतःचे मालकीची जागा नाही. हे कार्यालय आजही भाडे तत्त्‍वावर असलेल्या इमारतीत आपल्या कामकाजाचा गाडा हाकत आहे.

हेही वाचा - भाजपच्या किमान शंभर जणांची नावं आम्ही देऊ शकतो, ईडीने फक्त त्यांची चौकशी करावी -

संपादन - स्नेहल कदम