सिंधुदुर्गात अखेर कोविड प्रतिबंधक लस दाखल, उद्यापासून लसीकरण

ओरोस (जि. सिंधुदुर्ग) : जिल्ह्यात अखेर कोविड प्रतिबंधक लस गुरूवारी सायंकाळी दाखल झाली आहे. लस घेऊन येणाऱ्या वाहनाचे जिल्हा आरोग्य विभागाने विधिवत स्वागत करण्यात आले. पहिल्या टप्प्यात 10 हजार 260 डोस आले आहेत.

लसीकरणाचा प्रारंभ शनिवारी (ता. 16) होणार आहे. सिंधुदुर्गनगरी येथील जिल्हा सामान्य रुग्णालय, ओरोस येथे लसीकरण मोहिमेचा प्रारंभ होणार आहे. 
ही मोहीम जिल्ह्यातील तीन आरोग्य संस्थेत राबविली जाणार आहे. सिंधुदुर्गनगरी येथील जिल्हा सामान्य रुग्णालय, सावंतवाडी उपजिल्हा रुग्णालय व कणकवली उपजिल्हा रुग्णालय येथे लसीकरण केले जाणार आहे. तिन्ही संस्थांमध्ये यापूर्वी नोंदणी केलेल्या आरोग्य अधिकारी व कर्मचारी यांना कोविड प्रतिबंधक लस दिली जाणार आहे. प्रारंभाच्या दिवशी या तिन्ही संस्थांमध्ये प्रत्येकी 100 लाभार्थ्यांना लसीकरण करण्याचे नियोजन केले आहे. लसीकरणासाठी आवश्‍यक सर्व साधनसामुग्री, साहित्य याबाबतची पूर्वतयारी करण्यात आली असल्याची माहिती जिल्हा आरोग्य अधिकारी डॉ. महेश खलिपे यांनी दिली. 

तीन टप्प्यांत लसीकरण 
पहिल्या टप्प्यात कोरोना रुग्णाशी थेट संपर्क येणाऱ्या डॉक्‍टर, नर्स व अन्य कर्मचाऱ्यांना ही लस टोचली जाणार आहे. दुसऱ्या टप्प्यात कोरोना रुग्णाशी लांबून संपर्क होणाऱ्या पोलिस, आशा स्वयंसेविका आदी कर्मचाऱ्यांना दिली जाणार आहे. तिसऱ्या टप्प्यात "माझे कुटुंब, माझी जबाबदारी' अंतर्गत करण्यात आलेल्या सर्व्हेत आढळून आलेल्या गंभीर आजाराच्या रुग्णांना ही लस दिली जाणार आहे, अशी माहिती जिल्हा शल्य चिकित्सक डॉ. श्रीमंत चव्हाण यांनी दिली.  

              असे होईल लसीकरण

• पहिल्या कक्षात ः कोविन सॉफ्टवेअरमध्ये लाभार्थ्यांची नोंदणी होईल. नोंदणीनंतर संबंधित लाभार्थ्याला एक दिवस आधी मोबाईलवर संदेश पाठविला जाईल. त्यात किती वाजता, कोणत्या केंद्रावर लसीकरण आहे, याची माहिती असेल. संबंधित व्यक्ती लसीकरणासाठी आल्याची येथे नोंद होईल. 
• दुसऱ्या कक्षात ः संबंधित लाभार्थ्याचे तापमान, तसेच ऑक्‍सिजनची पातळी तपासली जाईल. त्यानंतर निर्जंतुकीकरण होईल. त्यानंतर लाभार्थ्याला लसीकरण कक्षात प्रवेश असेल. 
• तिसऱ्या कक्षात ः दोन वैद्यकीय कर्मचारी नोंदणीकृत लाभार्थी तोच आहे का, याची ओळखपत्र पाहून खात्री करून घेतील. त्याची नोंद कोविन ऍपमध्ये होईल. 
• चौथ्या कक्षात ः लसीकरण कक्षात लसीकरण प्रशिक्षित कर्मचाऱ्यांकडून संबंधित लाभार्थ्याला इंजेक्‍शनद्वारे लस टोचली जाईल. हेच कर्मचारी लशीबाबत माहिती देतील. 
• पाचव्या कक्षात ः लसीकरणानंतर प्रत्येक लाभार्थ्याला अर्धा तास या कक्षात विश्रांती दिली जाईल. तसेच त्या लाभार्थ्याच्या प्रकृतीचे निरीक्षण केले जाईल. काही त्रास झाल्यास उपचारासाठी स्वतंत्र किट येथे उपलब्ध असेल व झालेल्या त्रासाची नोंदही घेतली जाईल. एका व्यक्तीस लस देण्यासाठी सहा मिनिटांचा वेळ आहे. या व्यतिरिक्त अर्धा तास विश्रांती व निरीक्षणाखाली ठेवले जाणार आहे.