नारायण राणे यांच्या मेडिकल काॅलेजच्या उद्घाटनासाठी अमित शाह येणार सिंधुदुर्गला 

ओरोस - भारतीय जनता पक्षाचे राष्ट्रीय अध्यक्ष तथा देशाचे गृहमंत्री अमित शहा ६ फेब्रूवारी रोजी दुपारी १ वाजून ५० मिनिटानी सिंधूदुर्ग जिल्ह्यातील पडवे येथे हेलीकॉप्टरने येत आहेत. खास नारायण राणे यांच्या मेडिकल कॉलेजचे उद्घाटन करण्यासाठी शहा येत असून यावेळी विधानसभा विरोधी पक्षनेते देवेंद्र फडणवीस, विधान परिषद विरोधी पक्षनेते प्रवीण दरेकर, भाजप प्रदेशाध्यक्ष चंद्रकांत पाटील, भाजप नेते विनोद तावडे, आशीष शेलार उपस्थित राहणार आहेत, अशी माहिती खासदार नारायण राणे यांनी शनिवारी पत्रकार परिषदेत दिली.
 

पडवे येथील एस. एस. पी. एम. मेडिकल कॉलेज आणि हॉस्पिटल येथे आयोजित पत्रकार परिषदेला आमदार नितेश राणे, भाजप जिल्हाध्यक्ष राजन तेली, कुडाळचे माजी नगराध्यक्ष विनायक राणे, नगरसेवक राकेश कांदे, संतोष वालावलकर आदी  उपस्थित होते. 

 'मेडिकल कॉलेजला १५० विद्यार्थी प्रवेशाची परवानगी देण्यात आली आहे. १५ जानेवारी रोजी प्रवेश मुदत संपली. प्रवेश पहिल्याच फेरीत पूर्ण झाले असून २२५ विद्यार्थ्यांना प्रवेश नाकारावा लागला असल्याचे सांगून शहा यांच्या दाैऱ्याबद्दल सांगतना राणे म्हणाले, ६ फुब्रुवारीला दुपारी १ वाजून ५० मिनिटांनी अमित शहा मेडिकल कॉलेज येथे येणार आहेत. २ वाजून १० मिनिटांनी मेडिकल कॉलेजचे त्यांच्या हस्ते उद्घाटन होणार आहे.

हे पण वाचा - कोल्हापूरच्या शिरपेचात मानाचा तुरा;आठ वर्षाच्या दूर्वांकचे तीन विक्रम

एक तासभर ते येथे थांबणार आहेत. कॉलेजच्या सभागृहात हा कार्यक्रम होणार असून यावेळी विद्यार्थी व प्राध्यापक उपस्थित राहणार आहेत. त्यानंतर जिल्ह्यातील भाजप नेते त्यांचे स्वागत करणार आहेत. हा कार्यक्रम संपला की ते हेलीकॉप्टरने गोव्याला  जाणार आहेत.  

संपादन - धनाजी सुर्वे