‘सह्याद्री’च्या विद्यार्थ्यांचा कल्पक आविष्कार

सावर्डे - सह्याद्री तंत्रनिकेतन महाविद्यालयाच्या विद्यार्थ्यांनी कल्पकता, जिद्द व चिकाटीच्या जोरावर अभियांत्रिकीतील एस क्रिएटर आविष्कार प्रदर्शनात सादर करून जाणकारांची दाद मिळवली. येथील प्रदर्शनात २२ प्रकल्प असून, दुचाकी, चारचाकी, अमेरिकन बनावटीची कार, सौरउर्जेवर चालणारी रिक्षा, विविध ॲप्स, वेबसाईट आदींचा समावेश आहे. १२०० सीसी क्षमतेची २००० किलो वजनाची  ‘टेरिरन’ ही अमेरिकन बनावटीची लक्षवेधी मोटार बनवली आहे. प्राचार्य मंगेश भोसले यांनी ही तर भारतातील सर्वांत कमी किमतीची कार ठरू शकेल, असे मत व्यक्त केले आहे.

मन, मनगट आणि मेंदूचा मिलाफ झाला की अशक्‍य गोष्ट शक्‍य करता येते. विद्यार्थ्यांच्या कल्पकता आणि सर्जनशीलतेच्या जोरावर सह्याद्री तंत्रनिकेतन महाविद्यालयात सहा कार व दोन मोटारसायकलींचे अनावरण करण्यात आले. ‘टेरिरन’ मोटार लक्षवेधी ठरली आहे. १२०० सीसी क्षमतेची २००० किलो वजनाची १५ फूट लांबी असणारी आकर्षक ‘टेरिरन’ ही अमेरिकन बनावटीची मोटार केवळ नऊ महिन्यांत बनविण्यात आली. त्यासाठी दीड लाख रुपये खर्च आला. हाताळण्यास योग्य स्टेअरिंग, भारतातील सर्वात कमी किमतीची मोटार ठरू शकते, असे मत प्राचार्य भोसले यांनी व्यक्त केले. यश पाटील, रोहन जाधव, किरण सावंत, रोहित काताळे व प्रसाद पवार व त्यांच्या सहकाऱ्यांनी ही गाडी बनवली. 

गो-कार्ट ही देखील लक्षवेधी ठरली. दुचाकीचे इंजिन वापरून चारचाकी कार बनवली आहे. एका व्यक्तीसाठी हलक्‍या वजनाची ही कार अत्यंत माफक खर्चात बनवली आली. त्याला मागे-पुढे सस्पेंशन बसविले आहे. सौरऊर्जेवर चालणारी कार तीनचाकी आहे, तर अपंगासाठी ट्रायसिकल बनवली आहे. अपंगासाठी उत्तम हॅंडल व गिअरविना तीनचाकी सायकल बनवली आहे.

औद्योगिक क्षेत्रात आपल्या कल्पनाशक्तीच्या जोरावर तंत्रनिकेतनमध्ये शिकणारे विद्यार्थी उद्याचे चांगले अभियंते आहेत. ज्या-ज्या ठिकाणी ‘सह्याद्री’चे विद्यार्थी जातील, त्या-त्या ठिकाणी ते क्रांती घडवतील, असा विश्‍वास आहे.
- शेखर निकम, 
कार्याध्यक्ष, सह्याद्री शिक्षण संस्था