नर्सरी व्यावसायिकांसाठी सुरेश प्रभु धावले कृषीमंत्र्यांकडे

राजापूर ( रत्नागिरी ) - लॉकडाऊनचा फटका नर्सरी व्यवसायालाही बसला आहे. लॉकडाऊनमुळे वाहतुकीसाठी परवानगी नसल्याने अनेक रोपे नर्सरीमध्ये पडून राहिल्याने लाखो रुपयांचा नर्सरी व्यवसाय ठप्प झाला आहे. माजी केंद्रीयमंत्री सुरेश प्रभू यांनी नर्सरी व्यवसायिकांचा रोजीरोटीचा हा प्रश्‍न केंद्रीय कृषीमंत्री नरेंद्रसिंग तोमर यांच्यापुढे मांडला. त्यांच्याकडून सकारात्मक प्रतिसाद मिळाल्याने नर्सरी व्यवसायिकांचा वाहतुकीचा आणि रोप विक्रीचा प्रश्‍न सुटणार, असा विश्‍वास भाजपचे युवा नेते संतोष गांगण यांनी व्यक्त केला. 

दरवर्षी लाखो रुपयांची उलाढाल होत असलेला नर्सरी व्यवसाय अद्यापही ठप्प आहे. अटी आणि शर्थी घालून शासनाने लॉकडाऊनमध्येही व्यवसायाला सुरवात करण्यास परवानगी दिली नाही. पावसाळ्याच्या आरंभाला झाडांची शेतकऱ्यांसाठी लागवड केली जाते. या लागवडीसाठी लागणारी रोपांची नर्सरीमध्ये रुजवात केली जाते. त्यामध्ये मोठ्याप्रमाणात गुंतवणूकही करावी लागते. त्यासाठी बॅंकांकडून कर्जही घेऊन हा व्यवसाय केला जातो. यावर्षीही अनेक नर्सरी व्यवसायिकांनी नर्सरींमध्ये रोपांची रुजवात केली आहे. येत्या काही दिवसांमध्ये पाऊस पडून रोपांच्या लागवडीला सुरुवात होणार आहे.

वाहतुकीला परवानगी न मिळाल्यास नर्सरी व्यवसायिकांचा रोजीरोटीचा प्रश्‍न निर्माण होणार आहे. एवढेच नव्हे तर, बॅंक कर्जाचे हफ्ते कसे फेडायचे, हा प्रश्‍न भविष्यात त्यांना सतावणार आहे. हा प्रश्‍न माजी केंद्रीयमंत्री प्रभू यांनी केंद्री कृषीमंत्री तोमर यांच्याकडे पत्रव्यवहाराद्वारे मांडला. त्यांच्याशी चर्चाही केली, अशी माहिती संतोष गांगण यांनी दिली.