लोकगीतांत समाजाला आवाहन करण्याची ताकद | Sakal
sakal

बोलून बातमी शोधा

लोकगीतांत समाजाला आवाहन करण्याची ताकद
लोकगीतांत समाजाला आवाहन करण्याची ताकद

लोकगीतांत समाजाला आवाहन करण्याची ताकद

sakal_logo
By

लोकगीतांत समाजाला आवाहन करण्याची ताकद
मुख्य निवडणूक अधिकारी देशपांडे; जागर करून बक्षिसे मिळवा
मुंबई, ता. २८ ः लोकगीतांमधून समाजाला आवाहन करण्याची ताकद लक्षात घेऊन लोकशाही, मताधिकार यात त्याचा पुरेपूर वापर व्हावा, यासाठी मुख्य निवडणूक अधिकारी कार्यालयाने ‘लोकगीतांतून लोकशाहीचा जागर’ ही स्पर्धा आयोजित केली आहे. या स्पर्धेत राज्यातील नागरिकांनी एकल किंवा समूह गटाने सहभागी व्हावे, असे आवाहन मुख्य निवडणूक अधिकारी तथा अप्पर मुख्य सचिव श्रीकांत देशपांडे यांनी केले आहे.
ही स्पर्धा २६ सप्टेंबर ते ३१ ऑक्टोबर २०२२ या कालावधीत आयोजित करण्यात आली आहे. या स्पर्धेत मतदारयादीत नाव नोंदवणे आणि मताधिकार बजावणे, मतदारयादीतील दुबार नावे वगळण्यासाठी मतदार ओळखपत्राला आधारकार्ड जोडणे, मृत्यू किंवा स्थलांतर झाल्यास नाव वगळणे, विविध घटकांना (दिव्यांग, तृतीयपंथी, ज्येष्ठ नागरिक) दिल्या जाणाऱ्या सेवासुविधा, हे विषय केंद्रस्थानी ठेवून गीतरचना करता येईल. तसेच मताधिकार बजावताना जात, धर्म, पंथ निरपेक्ष राहून आपला लोकप्रतिनिधी निवडणे, पैसे किंवा इतर आमिषांना बळी न पडता मताधिकार बजावणे यांसारख्या विषयांवर गीतरचना करून लोकशाहीसंबधी जागृती करता येणार आहे.
स्त्रियांच्या गीतात सासर-माहेरचे उल्लेख असतात. लोकगीतांमधले माहेर गोड असते. जिथे खायला मिळते तर सासर द्वाड असते जे कोंडून मारते. सासर-माहेरच्या जागी लोकशाही-हुकूमशाही यांची प्रतिकात्मक रचना करायला आणि त्यांचे विशेष सांगायला खूपच वाव आहे. लोकगीतांच्या अंगभूत लवचिक स्वरूपामुळे त्यामध्ये आधुनिक स्त्रीचे मानस गुंफणेही सहजशक्य आहे आणि हे मानस गुंफताना तिच्या स्वतंत्र व्यक्तिमत्त्वाबरोबरीनेच तिने आपल्या मताधिकाराबाबत जागृत कसे व्हावे, हे सांगता येईल. लोकगीतांतील स्त्रीपेक्षा आजची स्त्री स्वतंत्र व्यक्तिमत्त्वाची आहे, निर्णयक्षम आहे, हे लक्षात घेऊन तिने आपला लोकप्रतिनिधीही स्वनिर्णयाने, लोकशाही मूल्यांना प्रमाण मानून गावाच्या-देशाच्या विकासाला प्राधान्य देणारा निवडावा, असे लोकगीतातून आवाहन करता येईल.

चौकट
बक्षिसे अशी...
समूहगटासाठी प्रथम क्रमांक २१ हजार रुपये, द्वितीय क्रमांक ११ हजार रुपये, तृतीय क्रमांक ५ हजार रुपये आणि उत्तेजनार्थ एक हजार रुपयांची एकूण दहा बक्षिसे आहेत तर एकल गटासाठी प्रथम क्रमांक ७ हजार रुपये, द्वितीय क्रमांक ५ हजार रुपये, तृतीय क्रमांक ३ हजार रुपये आणि उत्तेजनार्थ पाचशे रुपयांची एकूण दहा बक्षिसे आहेत.