कृतिशील आत्मशोधातून माणुसकीची राखण | Sakal
sakal

बोलून बातमी शोधा

कृतिशील आत्मशोधातून माणुसकीची राखण
कृतिशील आत्मशोधातून माणुसकीची राखण

कृतिशील आत्मशोधातून माणुसकीची राखण

sakal_logo
By

63685
सावंतवाडी ः ‘ढगाआडचा चंद्र’चे प्रकाशन करताना लेखक महावीर जोंधळे, रमेश गावस, प्रा. प्रवीण बांदेकर, अरविंद पाटकर, संपत देसाई, लेखक चंद्रकांत जाधव आदी.


कृतीशील विचारांतून माणुसकीची राखण

महावीर जोंधळे ः ‘ढगाआडचा चंद्र’चे सावंतवाडीत प्रकाशन

सकाळ वृत्तसेवा
सावंतवाडी, ता. २१ ः साहित्यात असो अथवा सांस्कृतिक जडणघडणीत असो, माणूस कधीच जन्मजात प्रतिभावंत नसतो, तो सभोवतालच्या परिस्थितीतून विकसित होत असतो. या देशातील हजारो वर्षांतील विषमता आजही ढगातील अनेक चंद्र याच प्रवृत्तीतून गिळंकृत करते; मात्र असे ढगाआड झालेले चंद्र कृतिशील विचारांच्या आत्मशोधातून पुढे येत असतात. तेच माणुसकीची खऱ्या अर्थाने राखण करतात, असे प्रतिपादन लेखक महावीर जोंधळे यांनी रविवारी येथे केले.
जनवादी साहित्य संस्कृती चळवळ व मनोविकास प्रकाशन संस्थेच्या संयुक्त विद्यमाने सावंतवाडीचे (सातार्डा) तथा गोव्यातील आंबेडकरवादी कार्यकर्ते चंद्रकांत जाधव यांच्या ‘ढगाआ़डचा चंद्र’ या आत्मकथनाच्या नव्या आवृत्तीचे प्रकाशन येथील श्रीराम वाचन मंदिर सभागृहात आयोजित केले होते. यावेळी जोंधळे कार्यक्रमाच्या अध्यक्ष पदावरून बोलत होते. यावेळी प्रमुख वक्ते म्हणून गोव्यातील पर्यावरणवादी ज्येष्ठ कार्यकर्ते रमेश गावस, तर प्रमुख पाहुणे म्हणून आघाडीचे कादंबरीकार प्रा. प्रवीण बांदेकर उपस्थित होते. व्यासपीठावर मनोविकास प्रकाशन संस्थेचे संचालक अरविंद पाटकर, जनवादी साहित्य संस्कृतीचे अध्यक्ष संपत देसाई, लेखक चंद्रकांत जाधव आदी उपस्थित होते.
प्रारंभी मान्यवरांच्या हस्ते डॉ. बाबासाहेब आंबेडकर, महात्मा फुले यांच्या प्रतिमेचे पूजन केल्यानंतर जनवादी साहित्य संस्कृतीचे सचिव अंकुश कदम यांनी स्वागत केले. तर अध्यक्ष संपत देसाई यांनी प्रास्ताविक केले. यावेळी प्रकाशक अरविंद पाटकर यांनी आपली मालवणी ओळख सांगून हे पुस्तक पुन्हा प्रकाशित करण्याचा धाडसी निर्णय आपण का घेतला, याचे विवेचन केले. सुरुवातीला हे पुस्तक वाचताना माझ्याही आयुष्यातील चळवळीचे दिवस आठवले, असे सांगून ‘गुराखी’ आणि ‘राखणो’ यातील फरक स्पष्ट केला. गुराख्याचे जीवन समजून घेण्यासाठी व अशा भयावह परिस्थितीतूनही लेखकाने जीवनात कशी उभारी घेतली, हे समजून घेण्यासाठी हे पुस्तक विकत घेऊनच वाचा आणि वाचन संस्कृतीला चालना द्या, असे आवाहन केले. प्रा. बांदेकर यांनी पुस्तकावर समीक्षा करताना ‘गुराखी’ हा शब्द जरी कामाचे स्वरुप स्पष्ट करत असला तरी खऱ्या अर्थाने ‘राखणा’ हा शब्दच समर्पक असल्याचे स्पष्ट केले. लेखकाने आपल्या आईचे वर्णन नकारात्मक जरी केले असले तरी त्या मागील बोध घेणे आवश्यक असल्याचे ते म्हणाले. लेखकाचे सामर्थ्य हे पदव्यांत नसून लिखाणात असते, असे सांगून जाधव यांचे लिखाण दर्जेदार, सकस असून गरजेनुसार मालवणीचा वापरही त्यांनी कल्पकतेने केल्याचे स्पष्ट केले. ज्येष्ठ पत्रकार सुरेश वाळवे यांनी मनोगत व्यक्त केले. यावेळी ‘सूर्य गिळणारी स्त्री’च्या लेखिका अरुणा सबाणे (नागपूर), ‘जग बदलणारे ग्रंथ’च्या लेखिका दीपा देशमुख, इंदुमती जोंधळे आदींसह प्राचार्य डॉ. काजरेकर, डॉ. देविदास बोर्डे, कवी विठ्ठल कदम, मधुकर मातोंडकर, कवयित्री सरिता पवार, ॲड. संदीप निंबाळकर, पत्रकार अवित बगळे, डॉ. महेश पेडणेकर, ॲड. योगेश पवार, प्रवीण कोटकर, दीपक पडेलकर, प्रवीण केरकर, जगन्नाथ पंडित, बी. एल. कदम, पत्रकार मोहन जाधव, अनंत कदम, प्रभाकर जाधव आदी मान्यवर उपस्थित होते. प्रकाशक पाटकर यांचा सत्कार करण्यात आला. कार्यक्रमाचे सूत्रसंचालन मिलिंद माटे यांनी केले, तर अंकुश कदम यांनी आभार मानले. कार्यक्रमानंतर सत्यशोधक परिवाराचा ‘शाहिरी जलसा’ कार्यक्रम पार पाडला.
--
चौकट
इतर मान्यवरांची मनोगते
प्रमुख वक्ते गावस यांनी लेखक जाधव यांनी आपल्या अगम्य इच्छाशक्तीच्या जोरावर जे भोगले, त्या भोगाचा वचपा आपल्या कर्तृत्वाने काढला आणि सुईच्या धाग्यातून, शिलाईच्या माध्यमातून खऱ्या चंद्राचा शोध घेतला, असे स्पष्ट केले. तर लेखक चंद्रकांत जाधव यांनी आपण गुराखी ते लेखक कसा बनलो, याबाबत आपला जीवनप्रवास कथन केला.