‘विजयदुर्ग ते कासार्डे रस्त्याची दुरुस्ती करा’

‘विजयदुर्ग ते कासार्डे
रस्त्याची दुरुस्ती करा’
देवगड, ता.१४ ः विजयदुर्ग-कासार्डे (ता.देवगड) मार्गावरील पडेल कँटीन ते वाघोटण भागातील रस्ता पूर्णपणे खराब झाला आहे. या रस्त्याची तातडीने डागडुजी करण्याची मागणी गिर्ये येथील सामाजिक कार्यकर्ते दिलदार चौगुले यांनी केली आहे. किल्ले विजयदुर्गला पर्यटकांची मोठी वर्दळ असते. सध्या उन्हाळी हंगाम असल्याने विजयदुर्गला पर्यटकांची ये-जा सुरू आहे. अशावेळी विजयदुर्ग-कासार्डे मार्गावरील पडेल कँटीन ते वाघोटणपर्यंतचा रस्ता खराब झाला असल्याने स्थानिक वाहन चालकांबरोबरच पर्यटकांना त्याचा त्रास सहन करावा लागत आहे. पर्यटकांमुळे स्थानिक उलाढालीत वाढ होते; मात्र रस्ते खराबीमुळे पर्यटकांची संख्या रोडावल्यास उद्योग व्यवसायावर त्याचा परिणाम होऊ शकतो. याकडे बांधकाम विभागाने तातडीने लक्ष देऊन रस्त्याची दुरुस्ती करण्याची मागणी केली आहे.