शाळांमधील सुविधांसाठी ५ टक्के निधीची तरतूद

जिल्हा परिषदः लोगो
...
शाळांमधील सुविधांसाठी ५ टक्के निधीची तरतूद

मंत्रिमंडळाचा निर्णय; डिजिटल शाळा, इंटरनेट वायफायची व्यवस्था
सकाळ वृत्तसेवा
रत्नागिरी, ता. १९ ः जिल्हा परिषद प्राथमिक आणि माध्यमिक शाळांमध्येही आता पायाभूत सुविधा देण्यासाठी शासनाने पावले उचलली आहेत. यानुसार शाळांमध्ये विज्ञान प्रयोगशाळा, संगणक प्रयोगशाळा, डिजिटल शाळा आणि इंटरनेट वायफाय यासह अन्य सुविधा देण्यासाठी जिल्हा नियोजनमधून ५ टक्के निधीची तरतूद करण्याचा निर्णय मंत्रिमंडळाने घेतला आहे.
जिल्हा वार्षिक योजनेतून शालेय शिक्षण क्रीडा विभागाशी संबंधित वेगवेगळ्या योजना ३० वर्षांपासून राबवल्या जात आहेत; मात्र, यातील काही योजना कालबाह्य झाल्या आहेत तसेच काही स्वतंत्रपणे राबवल्या जात आहेत. अशा योजना रद्द करून त्या ऐवजी काही नवीन योजनांचा समावेश केला आहे. केंद्र शासनाने २०१७ पासून देशातील सर्व राज्यांची शैक्षणिक क्रमवारी निश्चित केली आहे. त्यासाठी परफॉर्मन्स ग्रेड इंन्डेक्स योजना सुरू केली असून, त्या अंतर्गत काही बाबींना प्राधान्य देण्यात आले आहे. विविध योजना राबवण्यासाठी जिल्हा नियोजन समितीला मिळणाऱ्‍या एकूण निधीतून किमान ५ टक्के निधी शालेय शिक्षण विभागाशी निगडित (क्रीडा योजना वगळून) योजनांसाठी खर्च करण्यास मान्यता दिली आहे. आर्थिक वर्ष २०२२-२३ साठी याप्रमाणे निधीची तरतूद असणार आहे.
..
चौकट
विविध योजना अशा..
जिल्हा परिषद क्षेत्रातील प्राथमिक व माध्यमिक शाळांची इमारत व वर्गखोली दुरुस्ती, स्वच्छतागृह, शाळांची इमारत बांधकाम व वर्गखोली, दिव्यांग विद्यार्थ्यांसाठी रॅम्प व स्वच्छतागृह, वाचनालय, शैक्षणिक बोलक्या भिंती, माध्यमिक शाळेतील विद्यार्थिनीसाठी स्वतंत्र कक्ष स्थापन करणे, शाळेतील क्रीडांगण, पटांगण तयार करणे, प्राथमिक व माध्यमिक शाळांना संरक्षक भिंत तयार करणे, आदर्श शाळांमध्ये पायाभूत सुविधा तयार करणे, विज्ञान प्रयोगशाळा, संगणक प्रयोगशाळा, डिजिटल शाळा, इंटरनेट वायफाय सुविधा निर्माण करणे या योजनांचा समावेश आहे.