रत्नागिरी-क्राईम पट्टा

नांदिवडेत समुद्रात मासे
गरवताना प्रौढ बेपत्ता
सकाळ वृत्तसेवा
रत्नागिरी, ता. २० ः तालुक्यातील नांदिवडे येथे समुद्रात मासे गरवताना प्रौढ पाण्यात पडून बेपत्ता झाला. जयगड पोलिस ठाण्यात नोंद करण्यात आली आहे. अंकुश रामचंद्र भुते (वय ४५, रा. कुणबीवाडी-नांदिवडे, जयगड, ता. रत्नागिरी) असे समुद्राच्या लाटेमध्ये बेपत्ता झालेल्या प्रौढाचे नाव आहे. ही घटना बुधवारी (ता. २०) सकाळी दहाच्या सुमारास नांदिवडे येथे घडली. या प्रकरणी सर्वेश सुरेश तेरेकर (वय ३०, रा. कुणबीवाडी नांदिवडे) यांनी पोलिसात खबर दिली. पोलिसांना मिळालेल्या माहितीनुसार, बुधवारी सकाळी सर्वेश तेरेकर यांनी अंकुश भुते यांना नांदिवडे येथील समुद्रात मासे गरवताना पाहिले होते; परंतु सर्वेश यांना ते काही वेळाने पाण्यात बुडताना दिसले. त्या वेळी त्यांना वाचवण्यासाठी पाण्यात त्यांच्या दिशेने उतरले; पण पाण्याला करंट असल्याने त्यांच्याही पायाखालची वाळू सरकायला लागली. अंकुश समुद्राच्या लाटांमध्ये ओढला गेला आणि दिसेनासा झाला होता. त्याचा शोध घेतला; परंतु तो मिळून आला नाही. अधिक तपास पोलिसनाईक मोंडे करत आहेत.