खेड-किल्ले महिपतगडावर दुर्गवरील प्रतिष्ठानचे श्रमदान

किल्ले महिपतगडावर
दुर्गवीर प्रतिष्ठानचे श्रमदान
खेड, ता. २४ : तालुक्यातील किल्ले महिपतगड (वाडी बेलदार) येथे दुर्गवीर प्रतिष्ठानने श्रमदान मोहिम राबवली. तालुक्यातील दुर्गम भागातील गड संवर्धनासाठी शनिवारी (ता. २३) दुपारी ४ वाजता कार्यकर्ते महिपतगडाच्या दिशेने निघाले. मुसळधार पाऊस, खडतर रस्ता आणि रस्त्यावर पडलेल्या दरडी बाजूला करत या दुर्गवीर सदस्य रात्री ८ वाजता गडावर पोहोचले. पारेश्वर मंदिरामागे असलेल्या वाड्याच्या जोत्याच्या बाहेरील बाजूस कित्येक वर्षांपासून दगड मातीचा जो थर पडलेला होता, तो बाजूला करून दगड आणि मातीचे वर्गीकरण करून ठेवण्यात आले. १० दुर्गवीर सदस्यांनी ही श्रमदान मोहीम यशस्वी केली. जीवन सैतवडेकर, रोहित बालडे, राकेश इंदुलकर, मंदार दिवेकर,स्वप्नील गायकवाड, प्रथमेश सावंत, प्रसाद घाणेकर, सुनील शिंदे, ऋषिकेश निकम, सागर गुजर यांचा सहभाग होता. या मोहिमेसाठी ग्रुप ग्रामपंचायत मांडवेच्या सरपंच सौ. कासार, वाडी बेलदारचे पोलिस पाटील डी. एस. जाधव, मनोहर पवार आणि ग्रामस्थ यांचे सहकार्य लाभले.