घरफोडी प्रकरणी पोलिस कोठडी

घरफोडी प्रकरणी पोलिस कोठडी
सावंतवाडी, ता. ४ः शहरात घडलेल्या घरफोडीमधील संशयित सचिन राजू माने (वय ३०) याच्यासोबत आणखी काहीजण असल्याचा पोलिसांना संशय आहे. त्या दृष्टीने तपास सुरू आहे. दरम्यान, आज त्याला येथील न्यायालयात हजर केले असता एक दिवसाची पोलिस कोठडी देण्यात आली. त्याने चोरीची कबुली दिली आहे; मात्र अन्य साथीदारांची नावे सांगत नसल्याचे तपासी अधिकारी तथा पोलिस उपनिरीक्षक आनंद यशवंते यांनी सांगितले. उभाबाजार येथील महेश शेणई यांच्या घरात चोरी केल्याच्या संशयावरून पोलिसांनी संशयितास बुधवारी न्यायालयीन कोठडीतून ताब्यात घेतले होते. तर आज त्याला न्यायालयासमोर हजर केले असता पोलिसांनी अधिक तपासासाठी कोठडीची मागणी केली. त्यानुसार न्यायालयाने एक दिवसाची पोलिस कोठडी सुनावली.