चिपळूण ः अमृत महोत्सव गरिबांचा की भांडवलदारांचा | Sakal
sakal

बोलून बातमी शोधा

चिपळूण ः अमृत महोत्सव गरिबांचा की भांडवलदारांचा
चिपळूण ः अमृत महोत्सव गरिबांचा की भांडवलदारांचा

चिपळूण ः अमृत महोत्सव गरिबांचा की भांडवलदारांचा

sakal_logo
By

अमृत महोत्सव गरिबांचा की भांडवलदारांचा

कोयना प्रकल्पग्रस्तांचा सवाल , तीन पिढ्या नोकरीच्या प्रतीक्षेत

चिपळूण, ता. १२ ः कोयना प्रकल्पाच्या उभारणीसाठी चिपळूण (जि. रत्नागिरी) व पाटण (जि. सातारा) येथील प्रकल्पग्रस्तांनी आपले योगदान दिले. स्वातंत्र्याचा अमृत महोत्सव साजरा होत असताना या प्रकल्पग्रस्तांच्या तीन पिढ्या नोकऱ्यांसाठी हेलपाटे मारत आहेत. त्यामुळे खरच स्वातंत्र्य कुठे आहे? अमृत महोत्सव नक्की कोणाचा? गरिबांचा की भांडवलदारांचा, असा प्रश्न प्रकल्पग्रस्त विचारत आहेत.
कोयना प्रकल्प महाराष्ट्राच्या अर्थकारणातील महत्त्वाच्या धरणांपैकी एक आहे. कोयना धरणाच्या उभारणीमुळे वीज, सिंचन आणि पिण्याच्या पाण्याचा प्रश्न मार्गी लागला. कोयना प्रकल्पातून वीजनिर्मिती करून राज्याला कोट्यवधी रुपये मिळतात; मात्र या धरणाच्या निर्मितीसाठी चिपळूण व पाटण तालुक्यातील ज्या शेतकऱ्यांनी आपल्या जमिनी दिल्या त्यांच्या नशिबी फक्त आश्वासनच मिळाले आहे. पोफळी, कोळकेवाडी, नागावे, कोंडफणसवणे, पिंपळीतील शेतकऱ्यांची जमिन या प्रकल्पासाठी गेली आहे. त्याचा मोबदला मिळला. काहींना नोकऱ्या मिळाल्या, पर्यायी जमिन आणि पुनर्वसनही झाले; मात्र शंभर टक्के शेतकऱ्यांचे प्रश्न सुटलेले नाहीत. सध्या ११ हजाराहून अधिक प्रकल्पग्रस्त तरुणांनी महानिमिर्ती कंपनीकडून नोकरीसाठी अर्ज केला आहे.
६५ वर्षापासून आजपर्यंत तीन पिढ्या होऊनदेखील सरकार प्रकल्पग्रस्तांना नोकरी देण्याची मागणी पूर्ण करता आली नाही. त्याचा गैरफायदा स्थानिक राजकीय नेते घेत आहेत. प्रकल्पग्रस्तांचे प्रश्न सोडवण्यासाठी पुढाकार घ्यायचा, आंदोलन करायचे, मोर्चे काढायचे नंतर अधिकाऱ्यांशी हातमिळवणी करून ठेके घ्यायचे, अशी पद्धत राजकीय नेत्यांनी सुरू केली आहे. आज एका पक्षाने मोर्चा काढला तर सहा महिन्यानंतर दुसरा पक्ष उपोषण करतो. मोर्चा निघाला, उपोषण सुरू झाले की, मंत्रालयात बैठक घेण्याचे आश्वासन दिले जाते. नंतर उपोषण मागे घेतले जाते. त्यानंतर मंत्रालयातील बैठक मात्र होत नाही. हा मागील ६५ वर्षातील प्रकल्पग्रस्तांचा अनुभव आहे. भोळेभाबडे प्रकल्पग्रत नेत्यांना बैठकीविषयी विचारतात तेव्हा दोन-चार दिवसाचा अवधी घेत वेळ मारून नेली जाते. सरकार लक्ष देत नसल्याचा गैरफायदा घेत राजकीय नेते ठेकेदारीतून गब्बर झाले; मात्र प्रकल्पग्रस्तांचे प्रश्न जैसे थे राहिले. निवडणुका आल्या की, मतदारांना आकर्षित करण्यासाठी प्रकल्पग्रस्तांचा मुद्दा उचलून धरला जातो. निवडणूक संपली की, पुढच्या निवडणुकीपर्यंत प्रकल्पग्रस्तांचा मुद्दा बाजूला पडतो. सरकार लक्ष देत नाही, राजकीय नेते स्वार्थासाठी प्रकल्पग्रस्तांचा उपयोग करतात त्यामुळे आता विश्वास कोणावर ठेवायचा, असा प्रश्न प्रकल्पग्रस्तांना पडला आहे.
------------------
कोट
स्वातंत्र्याचा अमृत महोत्सव साजरा होत असताना ज्यांनी आपली घरेदारे, जमिनी सोडून देशाच्या विकासाचे विकासपुरुष झाले. त्याचवेळी खणाला खण फणाला फण देतो, म्हणून सांगितले; परंतु आजही नोकऱ्यांसाठी हेलपाटे मारून तीन पिढ्या गेल्या तरी प्रकल्पग्रस्त उपेक्षित आहेत. आम्ही प्रकल्पग्रस्त अजूनही खऱ्या अर्थाने स्वातंत्र्यांची वाट पाहत आहे.
- मैनुद्दीन सय्यद, पोफळी

Web Title: Todays Latest Marathi News Kop22y95328 Txt Ratnagiri Today

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..