चांदिवलीतील रखडलेल्‍या विकासकामांसाठी पाठपुरावा | Sakal
sakal

बोलून बातमी शोधा

चांदिवलीतील रखडलेल्‍या 
विकासकामांसाठी पाठपुरावा
चांदिवलीतील रखडलेल्‍या विकासकामांसाठी पाठपुरावा

चांदिवलीतील रखडलेल्‍या विकासकामांसाठी पाठपुरावा

sakal_logo
By

रखडलेल्‍या विकासकामांसाठी पाठपुरावा
मुंबई, ता. २४ ः साकीनाक्यात शिवाजी महाराजांचा पुतळा उभारण्याच्या मागणीसाठी तसेच चांदिवली मतदारसंघातील रखडलेल्या विविध विकासकामांना गती देण्यासाठी मनपा उपायुक्त (परिमंडळ ५) यांच्या दालनात माजी मंत्री व प्रदेश काँग्रेस कार्याध्यक्ष मो. आरिफ (नसीम) खान यांनी वरिष्ठ अधिकाऱ्यांच्या उपस्थितीत बैठक घेतली. कुर्ला-अंधेरी रस्ता (साकीनाका ते बैल बाजार) रुंदीकरण व दुरुस्तीचे काम सन २०१८ पासून वारंवार निर्णय करूनही वेळेत पूर्ण न झाल्याने तेथे नेहमीच मोठी वाहतूक कोंडी होते. साकीनाका परेरावाडी येथील झुंजार क्रीडा मैदानात प्रस्तावित छत्रपती शिवाजी महाराजांचा पुतळा बसवण्याचेही काम प्रलंबित आहे, असेही या बैठकीत खान यांनी दाखवून दिले.
चांदिवली फार्म रोड ते शिपिंग कार्पोरेशन ऑफ इंडिया येथील प्रस्तावित डीपी रोड पूर्ण करावा, मनुभाई चाळ ते जोगेश्वरी विक्रोळी लिंक रोडला जोडणाऱ्या रस्त्याचे रुंदीकरण व दुरुस्तीकरण व्हावे, सफेद नाल्यावरील पूल आणि अशोक नगर मारवा येथील हिंदू स्मशानभूमीजवळील पुलाचे काम पूर्ण करावे, मनीषा हॉटेल ते अंधेरी-घाटकोपर लिंक रोड पर्यंतच्या ९० फूट रस्त्यावरील अनधिकृत पार्किंग हटवून रस्ता मोकळा करावा, संघर्ष नगरमधील शाळेची इमारत मनपाच्या ताब्यात घेऊन नववी आणि दहावीचे वर्ग सुरू करावेत, तसेच रस्तादुरुस्ती आणि दिवाबत्तीची व्यवस्था करावी, चांदिवली मतदार संघात दत्तक वस्ती योजना प्रभावीपणे राबवून स्वच्छता करावी, पिण्याच्या पाण्याची समस्या दूर करावी आदी मागण्या या वेळी खान यांनी केल्या. उपायुक्त हर्षद काळे यांनी लवकरात लवकर वरील सर्व समस्या सोडवण्याचे आश्वासन दिले.
----
महापालिकेची स्वच्छता स्पर्धा
मुंबई, ता. २३ : केंद्रीय गृहनिर्माण आणि शहरी व्यवहार मंत्रालयातर्फे होणाऱ्‍या स्वच्छ सर्वेक्षण २०२३ मध्ये मुंबई महापालिका भाग घेत आहे. महापालिका क्षेत्रात विविध गटांमध्ये स्वच्छता स्पर्धा आयोजित करण्यात येत आहे. याअंतर्गत महापालिका २४ विभागांमधील हॉटेल्स, शाळा, रुग्णालये (आरोग्य सेवा सुविधा), निवासी संकुल, शासकीय कार्यालये आणि बाजार संघटना यांमध्ये स्वच्छता स्पर्धा राबवणार आहे.
मुंबईतील नागरिकांकडून ‘स्वच्छ भारत मिशन’ या विषयावरील जिंगल, चित्रफीत, पोस्टर किंवा रेखांकन, भित्तीचित्र, पथनाट्ये आयोजित करण्यात येणार आहेत. ‘स्वच्छ टेक्नॉलॉजी चॅलेंज’ अंतर्गत व्यक्ती, स्टार्ट-अप, कंपन्या, शैक्षणिक संस्थांकडून सामाजिक समावेश, शून्य कचरा, प्लास्टिक कचरा व्यवस्थापन, पारदर्शकता (डिजिटल सक्षमीकरण) यांसारख्या क्षेत्रात स्वच्छ भारत मिशनला चालना मिळेल. या प्रकारच्या नावीन्यपूर्ण उपक्रमांबाबत प्रवेशिका आमंत्रित करण्यात येत आहेत. या स्पर्धेत सहभाग नोंदवण्याची अखेरची तारीख २९ जानेवारी असल्याची माहिती घन कचरा व्यवस्थापन खात्याच्या उपयुक्त चंदा जाधव यांनी दिली आहे. स्पर्धेच्या प्रत्येक गटातील विजेत्यांना रोख रक्कम व प्रमाणपत्र देऊन मुंबई महापालिकेतर्फे गौरवण्यात येणार आहे. या स्पर्धेअंतर्गत एकूण आठ प्रमुख गट आहेत.