कोविड काळातील 2 कोटी थकबाकीचा बोजा पालिकेवर

rat०२३४.txt

(पान ३ साठी)

पाणीपट्टी न भरल्यास नळजोडणी तोडणार

रत्नागिरी पालिका ; कोविडमधील २ कोटी थकबाकीचा बोजा

सकाळ वृत्तसेवा
रत्नागिरी, ता. २ ः रत्नागिरी पालिकेवर कोविड काळातील पाणीपट्टी वसुलीचा २ कोटीचा बोजा कायम आहे. त्यात या आर्थिक वर्षातील पाणीपट्टी २ कोटी असे ४ कोटी वसुलीचे मोठे उद्दिष्ट पालिकेच्या पाणी विभागासमोर आहे; परंतु पाणी विभागाने चांगली कामगिरी करत ५० टक्के वसुली केली आहे. या महिन्याच्या १५ तारखेला थकबाकीदारांना नोटिसा बजावण्यात येणार आहेत. त्या मुदतीत पाणीपट्टी न भरल्यास नळजोडणी तोडण्याचा इशारा पालिकेने दिला आहे.

घरपट्टी, पाणीपट्टी पालिकेच्या आर्थिक उत्पन्नाचे मुख्य साधन आहे. हे कर शंभर टक्के वसूल झाल्यास पालिकेला मोठा आर्थिक हात मिळतो; परंतु कोरोना काळानंतर पालिकेच्या या करांच्या वसुलीवरही मोठा परिणाम झाला. पाणीपट्टी वसुलीचे २ कोटीचे उद्दिष्ट पालिकेला दरवर्षी असते; मात्र कोरोना काळात २ कोटी पाणीपट्टी अद्याप थकित असल्याने पालिकेवर त्याचा बोजा पडला आहे. या आर्थिक वर्षातील २ कोटी आणि थकित २ कोटी अशा ४ कोटी पाणीपट्टी वसुलीचे टार्गेट पालिकेसमोर आहे. पाणी विभागाने त्यापैकी २ कोटी रुपये वसूल केले आहेत आणि या महिन्यात उर्वरित २ कोटी वसूल करून १०० टक्के पाणीपट्टी वसुलीचे लक्ष्य पाणी विभागाने ठेवले आहे.
शहरामध्ये एकूण १० हजार ८८५ नळजोडणी धारक आहेत. त्यांच्याकडून पाणीपट्टीच्या मध्यमातून २ कोटीचा महसूल पालिकेला मिळतो; परंतु या वेळी पाणी विभागाला थकित पाणीपट्टी धरून ४ कोटीची थकबाकी वसूल करायची आहे.

दृष्टीक्षेपात...
* एकूण नळधारक १० हजार ८८५
* दरवर्षीचे उद्दिष्ट २ कोटी
* १५ फेब्रुवारीला बजावल्या जाणार नोटिसा
* मुदतीत पाणीपट्टी न भरल्यास जोडणी तोडणार