जिल्ह्यातील पत्रकारांसाठी कन्याकुमारी अभ्यास दौरा

जिल्ह्यातील पत्रकारांसाठी
कन्याकुमारी अभ्यास दौरा

अंजनी स्वामी ट्रस्ट, ‘परफेक्ट’चा पुढाकार

सकाळ वृत्तसेवा
कुडाळ, ता. २७ ः श्री अंजनी स्वामी ट्रस्ट, तिरूवत्तार कन्याकुमारी आणि परफेक्ट ॲकॅडमी कुडाळच्या संयुक्त विद्यमानातून जिल्ह्यातील पत्रकारांचा आजपासून पाच दिवसांचा अभ्यास दौरा आयोजित केला आहे. यात जिल्ह्यातील पत्रकार कन्याकुमारी जिल्ह्यातील विविध पर्यटनस्थळे, श्री अंजनी या स्वामी ट्रस्टचे नियोजित भव्य हनुमान मंदिर तथा मेडिटेशन सेंटरचा प्रकल्प, दक्षिण भारतातील अग्रगण्य अशा नामांकित शैक्षणिक संस्था, परफेक्ट ॲकॅडमीच्या दक्षिण भारतातील महत्त्वाच्या शाखांना भेटी दिल्या जाणार आहेत.
परफेक्ट ॲकॅडमी दक्षिण भारत तसेच गोवा आणि कोकण येथील अग्रगण्य नामांकित संस्था आहे. केरळ आणि तामिळनाडू राज्यातील विकसित शिक्षण पद्धती कोकणात देखील आणता यावी, असा ॲकॅडमीचा मानस आहे. श्री अंजनी या स्वामी स्पिरिट्युअल ट्रस्ट दक्षिण भारतातील प्रसिद्ध संस्था आहे. श्री अंजनेया सिद्धार्थ स्वामी (संतोष कुमार) यांच्या मार्गदर्शनाखाली सौ. ब्रिन्दाश्रीकुमार यांनी या ट्रस्टची स्थापना केली. यांच्या माध्यमातून भारतातील विविध भागात, मेडिटेशन शिबिरे, आरोग्य शिबिरे, तसेच रोजगार मेळावे घेतले जातात. जिल्ह्यात देखील मानसिक स्वास्थ्य सांभाळण्यासाठी मेडिटेशनचा वापरासाठी मोफत मेडिटेशन शिबिर या ट्रस्ट मार्फत घेण्यात आले. कन्याकुमारी येथे ट्रस्टतर्फे श्री हनुमंताचे मंदिर, ध्यान मंडप, ८० फुटाची हनुमंताची मूर्ती, असा भव्य पर्यटन प्रकल्प उभारण्यात येणार आहे. अशा प्रकल्पांमधून प्रेरणा घेऊन जिल्ह्यातील पर्यटन स्थळे कशी अजून जगासमोर ठेवता येतील, हे देखील या दौऱ्यातून साध्य करता येणार आहे. या दौऱ्यामध्ये जिल्ह्यातील पत्रकार समाविष्ट होणार असून याचा उपयोग केरळ, तामिळनाडू येथील अध्यात्मिक, शैक्षणिक आणि सामाजिक गोष्टींचा अभ्यास करण्यासाठी होईल, अशी माहिती ॲकॅडमीचे संस्थापक प्रा. राजाराम परब यांनी दिली.