कुडाळमध्ये बुधवारपासून भाजपतर्फे ‘महिला महोत्सव’

कुडाळमध्ये बुधवारपासून
भाजपतर्फे ‘महिला महोत्सव’

कुडाळ, ता. ४ ः येथील भाजप महिला मोर्चाच्यावतीने महिला दिनानिमित्त भव्य महिला महोत्सवाचे आयोजन करण्यात आले आहे. हा महोत्सव ८ व ९ मार्च या कालावधीत होणार आहे. महोत्सवांतर्गत विविध स्पर्धांचे आयोजन केले आहे. यात महिलांसाठी रस्सीखेच, तालुकास्तरीय वेशभूषा, खेळ पैठणीचा, उखाणा व पाककला आदी स्पर्धांचा समावेश आहे. महिलांनी मोठ्या संख्येने या उपक्रमात सहभागी व्हावे, असे आवाहन जिल्हाध्यक्षा दीपलक्ष्मी पडते यांनी केले आहे.
याबाबत दिलेल्या प्रसिद्धी पत्रकात म्हटले आहे की, बुधवारी (ता. ८) सायंकाळी साडेपाचला महिलांच्या रस्सीखेच स्पर्धेचे आयोजन केले आहे. तसेच कुडाळ तालुक्यातील महिलांसाठी वेशभूषा स्पर्धा होणार असून पहिल्या तीन स्पर्धकांना आकर्षक बक्षिसे देण्यात येतील. पाककला स्पर्धेसाठी मेनू भाज्यांपासून थालीपीठ असा आहे. सौभाग्यवती कुडाळ (खेळ पैठणीचा) स्पर्धेसाठी प्रथम पैठणी, द्वितीय सोन्याची नथ, तृतीय चांदीचा छल्ला अशी आकर्षक बक्षिसे आहेत. उखाणा स्पर्धेसाठी चांदीचा करंडा, चांदीची पैंजण व चांदीची जोडवी अशी प्रथम तीन बक्षिसे आहेत. सहभागी स्पर्धकांना भेटवस्तू देण्यात येणार आहेत. महिला ढोलपथक, निमंत्रित ग्रुप डान्सचा नजराणा, प्रेक्षकांसाठी लकी ड्रॉ, खाऊगल्ली, फटाक्यांची आतषबाजी आदी विविध उपक्रम राबविण्यात येणार आहेत. प्रेक्षकांसाठी प्रश्नमंजुषा घेण्यात येईल. विजेत्यांना चांदीची नाणी देण्यात येणार आहेत. या सर्व स्पर्धांमध्ये महिलांनी उत्स्फूर्त सहभाग घ्यावा, असे आवाहन केले आहे.