दशावतार कलाकार, चित्ररथ लक्षवेधी

90753
कणकवली : गुढी पाडव्यानिमित्त आज कणकवली शहरातून स्वागतयात्रा काढण्यात आली. (छायाचित्र : प्रथमेश जाधव)

दशावतार कलाकार, चित्ररथ लक्षवेधी

कणकवलीत नववर्षानिमित्त स्वागतयात्रा; महिलांची मोठी उपस्थिती

कणकवली, ता.२२ : हिंदू नववर्ष व गुढीपाडव्यानिमित्त आज शहरातून स्वागतयात्रा काढण्यात आली. ढोल-ताशांच्या गजरात, लेझीम पथकाच्या साथीने निघालेल्या स्वागत यात्रेने कनकनगरी दुमदुमून गेली. या नववर्ष स्वागत यात्रेतील दशावतारी कलाकार, भारत माता चित्ररथ लक्षवेधी ठरले. महिला व पुरुष पारंपरिक वेशभूषा करून मोठ्या संख्येने या यात्रेत सहभागी झाले होते.
नगराध्यक्ष समीर नलावडे यांच्या हस्ते छत्रपती शिवाजी महाराजांच्या पुतळ्याला पुष्पहार अर्पण करून या स्वागत यात्रेचा प्रारंभ करण्यात आला. यात्रेत आमदार नीतेश राणे, भाजप तालुकाध्यक्ष मिलिंद मेस्त्री, कलमठचे सरपंच संदीप मेस्त्री, राजश्री धुमाळे, साक्षी वाळके, नगरसेवक संजय कामतेकर, संजय मालंडकर, सामाजिक कार्यकर्ते आनंद पारकर, दादा कोरडे, सुशील पारकर, नंदकुमार आरोलकर, सुनील सावंत, वैजयंती करंदीकर, मृणाल ठाकूर, दत्तप्रसाद ठाकूर, प्रतिभा करंबेळकर, हरीश गणपते, संदीप राणे, सत्यविजय जाधव, समर्थ राणे, श्रीधर मुसळे, सूर्यकांत मालवणकर आदी उपस्थित होते.
---
शोभायात्रेने कनकनगरी भगवी
शोभायात्रेतील सिंधुगर्जना ढोल पथकाने परिसर दणाणून गेला. पारंपारिक वेशातील स्त्री, पुरूष आणि भगवे ध्वज, चित्ररथ, वारकरी दिंडीमुळे शहर भगवेमय झाले होते. छत्रपती शिवाजी महाराज चौकातून सुरू झालेली शोभायात्रा आप्पासाहेब पटवर्धन चौक, बाजारपेठमार्गे विद्यामंदिराच्या पटांगणावर पोहचली. शिवारा मंदिराजवळ शोभा यात्रेचा समारोप झाला. यावेळी ‘हिंदू नववर्ष आणि गुढीपाडवा संस्कृती’ याविषयी विवेक मुतालीक यांनी मार्गदर्शन केले.