जिल्हास्तरीय भजन स्पर्धेचे ओटवणेत रविवारी आयोजन

जिल्हास्तरीय भजन स्पर्धेचे
ओटवणेत रविवारी आयोजन
ओटवणे, ता. २६ ः सातुळी येथील स्वराज्य ग्रुप आणि सातुळी ग्रामस्थांच्या संयुक्त विद्यमाने प्रसिद्ध दशावतार हार्मोनियम वादक (कै.) सुभाष परब यांच्या स्मरणार्थ रविवारी (ता. ३०) जिल्हास्तरीय निमंत्रितांच्या पुरुष आणि महिला गट खुल्या भजन स्पर्धेचे आयोजन केले आहे. या दोन्ही गटातील भजन स्पर्धेसाठी जिल्ह्यातील ८ भजन संघांना निमंत्रित केले आहे. स्पर्धेच्या उद्‍घाटन प्रसंगी जिल्ह्यातील प्रसिद्ध पखवाज विशारद डॉ. दादा परब यांचा पखवाज सोलो व ढोलकी वादनाचा कार्यक्रम होणार आहे.
भजन स्पर्धेच्या पुरुष गटासाठी विघ्नेश्वर मंडळ (बावळाट, बुवा नारायण सावंत), श्री सनाम देव (सांगेली, बुवा खेमराज सनाम), रवळनाथ प्रसादिक (पाडलोस, बुवा अजित गावडे), भवानी प्रासादिक (न्हावेली, बुवा अक्षय जाधव), तर महिला गटासाठी श्री दादरेकर प्रासादिक (तुळसुली, बुवा अंतरा सावंत), अभंग महिला भजन मंडळ (कुडाळ, बुवा कोमल पावसकर), श्री ब्राह्मण देव प्रासादिक (आडेली, बुवा वैशाली कोंडुस्कर), श्री सिद्धेश्वर प्रासादिक (खानोली, बुवा आकांक्षा खानोलकर) मंडळांना निमंत्रित केले आहे. दोन्ही गटातील विजेत्या भजन मंडळांना अनुक्रमे ५३३३, ३३३३ रुपये, दोन्ही गटातील प्रत्येकी एका भजन मंडळाला दशावतार स्वरानंद पुरस्कार आणि राजयोग लक्ष्मी पुरस्कार या विशेष पुरस्कारांसह प्रत्येकी २०२३ रुपयांचे पारितोषिक देण्यात येणार आहे. पारितोषिक वितरण स्पर्धा संपल्यानंतर मान्यवरांच्या उपस्थितीत होणार आहे.