कोकणातील जमिनीवर व्यवसाय उभारा

-ratchl४४.jpg-
२४N०९३२१
चिपळूण ः मेळाव्यात मार्गदर्शन करताना नरेंद्र पाटील.
--------------
कोकणातील जमिनीवर व्यवसाय उभारा

नरेंद्र पाटील ः जमिनी अभ्यास करून लागवडीखाली आणा, मराठा शक्ती मेळावा
सकाळ वृत्तसेवा
चिपळूण, ता. ४ ः कोकण विकासापासून वंचित राहता कामा नये शिवाय इथल्या जमिनी कोणाच्या तरी ताब्यात जाता कामा नये, कोकणातील जमिनी विकण्यापेक्षा त्या जमिनीवर व्यवसाय उभारा. कोकणातील जमिनीमध्ये उपयुक्त शेती होऊ शकते, याचा अभ्यास करून त्या जमिनी शेती लागवाडीखाली आणा. त्या पिकासाठी मार्केट तयार करण्यासाठी प्रयत्न झाला पाहिजे, असे प्रतिपादन अण्णासाहेब पाटील आर्थिक मागास महामंडळाचे अध्यक्ष नरेंद्र पाटील यांनी केले.

शहरातील इंदिरा गांधी सांस्कृतिक केंद्रात अखिल भारतीय मराठा महासंघ, रत्नागिरी शाखा यांच्यावतीने मराठा शक्ती, संस्कृती जागृती मेळाव्यात ते बोलत होते. पाटील म्हणाले, राज्यात अण्णासाहेब पाटील आर्थिक मागास महामंडळ सर्वात जास्त काम करत आहे. याचे कारण म्हणजे मराठा समाजात या महामंडळाविषयी जागृती निर्माण होत आहे. महामंडळातून मिळणाऱ्या योजनेतून मराठा बांधव उद्योग, व्यवसायामध्ये यशस्वी होऊ लागले आहेत. मराठा समाजाने महामंडळातून मिळणाऱ्या संधीतून व्यवसाय, उद्योगात सक्षम झाले पाहिजे. औद्योगिक क्षेत्रातील जमिनी अनेक वर्ष ताब्यात घेऊन त्यावर उद्योग उभारलेले नाहीत. यात प्रामुख्याने उद्योगपती व एमआयडीसीच्या अधिकाऱ्यांचे मोठे रॅकेट आहे. यासाठी स्थानिक लोकप्रतिनिधींनी या विषयी आवाज उठवून उद्योग न उभारलेल्या त्या जमिनी स्थानिक लोकांना व्यवसाय उद्योगाला देण्यासाठीचा प्रयत्न केला पाहिजे. लोकप्रतिनिधींनी केवळ गटार, रस्ते इथपर्यंत मर्यादित न राहता तरुणवर्गाला रोजगार कसा उपलब्ध होईल, यासाठी विशेष प्रयत्न केला पाहिजे.
----
व्यवसाय, उद्योगाकडे वळावे
अ. भा. मराठा महासंघाचे राष्ट्रीय अध्यक्ष राजेंद्र कोंढरे म्हणाले, कोकणातील मराठा समाजाला व्यवसाय, उद्योगाकडे जावे लागणार आहे. मराठा बांधवांनी व्यावसायिक, उद्योगाकडे वाटचाल करण्यासाठी शंका न काढता धोरणाची चिकित्सा करत सातत्याने उपलब्ध संधी शोधल्या पाहिजेत. यासाठी मराठा समाजातील तरुणांनी पुढे आले पाहिजे. या कामासाठी ग्रुप तयार करा. यातून समाजातील प्रश्न सोडवले जातील.