मनसे, बळीराजा सेनेवर दोन्ही शिवसेनेचे भवितव्य

मनसे, बळीराजा सेनेवर
दोन्ही शिवसेनेचे भवितव्य

दापोली विधानसभा निवडणूक; उत्सुकता शिगेला

सकाळ वृत्तसेवा
मंडणगड, ता. ३१ ः दापोली विधानसभा मतदारसंघातील लढत लक्षवेधी ठरणार आहे. या निवडणुकीत दोन शिवसेना समोरासमोर उभी ठाकली आहे. यंदा मनसे आणि बळीराजा सेना हे पक्षदेखील निवडणूक रिंगणात उतरल्यामुळे त्याला वेगळे महत्त्व प्राप्त झाले आहे.
शिवसेना शिंदे गटाकडून उमेदवार आमदार योगेश कदम हे रिंगणात आहेत, तर शिवसेना ठाकरे गटाकडून माजी आमदार संजय कदम यांनी प्रस्थापितांविरोधात आव्हान उभे केले आहे. राज्यातील सत्तासंघर्ष, पक्षांतर्गत फुटीनंतर होणारी पहिली निवडणूक आहे. सत्तासंघर्षाच्या पेचप्रसंगाचा शहरीबरोबरच ग्रामीण भागात प्रभाव पाहायला मिळाला. कार्यकर्ते काही काळ विचलित झाले होते. यानंतर मतदारसंघात घडलेल्या घडमोडीमध्ये माजी आमदार संजय कदम यांनी राष्ट्रवादीतून ‘घरवापसी’ करत शिवसेना ठाकरे गटात पक्षप्रवेश केला. शिवसेनेचा बालेकिल्ला म्हणून लौकिक असलेल्या मतदारसंघात शिवसेनेची दोन भागांत विभागणी झाली. दोघांनाही राजकारणातली मांडणी नव्याने करावी लागणार आहे. दोन्हीकडील आघाड्यांमध्ये वर्चस्व प्रस्थापित करण्याचे आव्हान नक्कीच आहे. सध्यातरी दोन्ही प्रबळ दावेदार तुल्यबळ असल्याचा अंदाज बांधला जात आहे. स्थानिक, तसेच राज्यस्तरावरील विविध मुद्द्यांवर ही निवडणूक नक्कीच आधारभूत असू शकते. यामध्ये मनसे आणि बळीराजा सेना हे पक्षदेखील निवडणूक रिंगणात उतरल्यामुळे त्याला वेगळे महत्त्व प्राप्त झाले आहे. या मतदरासंघात कुणबी समाज मोठ्याप्रमाणात असल्यामुळे त्याचा फटका कुणाला बसणार, याकडे सर्वांचे लक्ष लागले आहे.
------
मित्रपक्षांच्या मतांचे महत्त्व
विकास, लाडकी बहीण योजना, सहानुभूती, बेरोजगारी, शिक्षण, पर्यटन याशिवाय अनेक मुद्दे या निवडणुकीत प्रकर्षाने पाहायला मिळू शकतात. निवडणुकीत मित्रपक्षांची साथ व रिंगणात असलेल्या अन्य राजकीय पक्षांच्या उमेदवारांनी घेतलेली मते यांचाही प्रभाव तितकाच महत्त्वाचा ठरू शकतो. दापोली मतदारसंघात २ लाख ९० हजार मतदारसंख्या आहे. मंडणगड व खेडच्या तुलनेत सर्वाधिक मतदारसंख्या दापोली तालुक्यात आहे. मित्रपक्षांची मते बेरजेत असणे हे तितकेच महत्त्वाचे आहे.
---------
---------