कोकण रेल्वे मार्गावर आजपासून उन्हाळी वेळापत्रक

कोकण रेल्वे मार्गावर आजपासून उन्हाळी वेळापत्रक
सर्व गाड्यांचा वेग होणार ताशी १३० ते १६० किमी; प्रवाशांना मोठा दिलासा
सकाळ वृत्तसेवा
कणकवली, ता. ३१ः कोकण रेल्वे मार्गावर उद्यापासून (ता. १) उन्हाळी वेळापत्रक लागू होणार आहे. त्यामुळे सर्व गाड्यांचा वेग वाढणार आहे. नव्या वेळापत्रकानुसार स्थानकावर येणाऱ्या आणि जाणाऱ्या गाड्यांच्या वेळा एक ते दोन तास बदलणार आहेत.
कोकण रेल्वे मार्गावर रेल्वेचे वेळापत्रक दोन टप्प्यात चालवले जाते. पहिल्या टप्प्यात एक नोव्हेंबर ते ९ जून हा उन्हाळी हंगामातील वेळापत्रक नियोजनाचा कालावधी असतो तर पावसाळी हंगामासाठी वेगावर मर्यादा ठेवून १० जून ते ३१ ऑक्टोबर या कालावधीमध्ये गाड्यांचा वेग निश्चित केला जातो. नव्या वेळपत्रकानुसार गाड्यांचा वेग ताशी १३० ते १६० किमी राहील. यामुळे या मार्गावर वेगवान धावणारी वंदे भारत एक्सप्रेस अवघ्या ७ तास ४५ मिनिटामध्ये मुंबईहून मडगावला पोहोचणार आहे. तर तेजस एक्सप्रेस ९ तास १० मिनिटांमध्ये मडगावला पोहोचणार आहे. जनशताब्दी एक्सप्रेस ही ९ तास २० मिनिटामध्ये मुंबईहून मडगावला पोहोचणार आहे. त्यामुळे प्रवासी वर्गाला मोठा दिलासा मिळणार आहे.
कोकण कन्या एक्सप्रेस मडगाव येथून सायंकाळी ७.०० सुटून सावंतवाडीला ८.३८ वाजता, कुडाळ ९.००, सिंधुदुर्गनगरी ९.१४, कणकवली ९.३० आणि वैभववाडीला ९.५६ वाजता सुटून मुंबई सीएसटीला पहाटे ५.४० वाजता पोहोचणार आहे. जनशताब्दी एक्सप्रेस मडगाव येथून दुपारी ३.०५ वाजता सुटून सावंतवाडीला दुपारी ४.२४, कुडाळ ४.४२, कणकवली ५.०४ वाजता येणार आहे. वंदे भारत एक्सप्रेस मडगाव येथून दुपारी २.४० वाजात सुटून कणकवली सायंकाळी ४.२० वाजता येणार आहे. मांडवी एक्सप्रेस मडगाव येथून सकाळी ९.१५ वाजता सुटून सावंतवाडीला १०.४२, कुडाळ ११.४, सिंधुदुर्ग नगरी ११.१७ कणकवली ११.३२ तर वैभववाडीला ११.५८ येणार आहे. तुतारी एक्सप्रेस सावंतवाडी येथून रात्री ८ वाजता सुटून कुडाळ ८.१६, सिंधुदुर्ग रोड ८.३०, कणकवली ८.४७, नांदगाव ८.५८ वाजात, वैभववाडी ९.१४ वाजता पोहोचेल.