क्राईम

विनापरवाना शस्त्र
बाळगणाऱ्यावर गुन्हा

खेड, ता. ३१ : विनापरवाना शस्त्र बाळगल्याप्रकरणी तालुक्यातील पोयनार- कोंडवाडी येथील एकावर गुन्हा दाखल करण्यात आला आहे. विजय हनुमंत धुमक (५९, रा. पोयनार- कोंडवाडी) असे गुन्हा दाखल झालेल्याचे नाव आहे. विजय हनुमंत धुमक हा विनापरवाना असलेल्या ५० हजार रुपये किंमतीच्या सिंगल बॅरल असलेल्या ठासणीच्या बंदुकीसह लहान-मोठे छरे व गन पावडरसह २९ ऑक्टोबरला सायंकाळी मिळून आला. त्याच्यावर विनापरवाना शस्त्र बाळगल्याप्रकरणी खेड पोलिस ठाण्याचे शिपाई राहुल रामचंद्र कोरे यांनी फिर्याद दिल्यावरून विजय धुमक याच्यावर भारतीय शस्त्र अधिनियम प्रमाणे गुन्हा दाखल करून त्याला नोटीस देण्यात आलेली आहे. या प्रकरणी अधिक तपास खेड पोलिस करत आहेत.
------------------------------------
पोयनारमध्ये हातभट्टी छापा
खेड ः तालुक्यातील पोयनार- बौद्धवाडी येथील एका गावठी हातभट्टी दारूधंद्यावर येथील पोलिसांनी छापा टाकून ३ हजार ५५ रुपये किंमतीची गावठी दारू जप्त केली. ही कारवाई २९ ऑक्टोबरला रात्री करण्यात आली. या प्रकरणी एकावर येथील खेड पोलिस ठाण्यात गुन्हा दाखल करण्यात आला आहे. सुजीत सिताराम मोगरे (वय ४५ , रा. पोयनार, ता. खेड) असे गुन्हा दाखल झालेल्यांचे नाव आहे. गैरकायदा विनापरवाना ३ हजार ५५० रुपये किंमतीचा निळ्या रंगाचा प्लास्टिकची ३५ लिटर गावठी हातभट्टीची दारू आढळून आली. त्याच्यावर गुन्हा दाखल करण्यात आला आहे.
-----
बर्निंग कारचा
भोस्ते घाटात थरार

खेड ः मुंबई-गोवा महामार्गावर खेडमधील भोस्ते घाटामध्ये बुधवारी सकाळी ११ वाजण्याच्या सुमारास एका कारला अचानक आग लागली. यामुळे बर्निंग कारचा थरार पाहायला मिळाला. मुंबईहून गोव्याच्या दिशेने जाणाऱ्या कारला भोस्ते घाट चढताना अचानक आग लागली. ही आग लागल्याचे समजताच कारमधील प्रवासी सुखरूप बाहेर पडले. काही क्षणातच संपूर्ण कारने पेट घेतला. कार तब्बल दोन तास पेटत होती. महामार्गावरील एक बाजू तात्पुरती बंद करून दुसऱ्या मार्गिकेवरून वाहतूक वळवण्यात आली होती. याबाबतची माहिती येथील नगर पालिकेच्या अग्निशमन दलाला मिळताच अग्निशमन दलाच्या जवानांच्या मदतीने पेटलेली कार विझवण्यात यश आले.