चिपळुणात मोकाट गाढवांना पकडले

- rat३१p२३.jpg-
२४N२२४४४
चिपळूण ः चिपळूण पालिकेने पकडलेली मोकाट गाढवं.
---------

चिपळुणात मोकाट गाढवांना पकडले

पालिकेची कारवाई ; मालकांना बसणार दंड

सकाळ वृत्तसेवा
चिपळूण, ता. ३१ ः शहर परिसरात फिरणारी मोकाट गाढवे आणि उनाड गुरांवर कारवाई करण्याची मोहीम चिपळूण पालिका प्रशासनाने हाती घेतली आहे. बुधवारी (ता. ३०) पालिकेच्या पथकाने या मोहिमेंतर्गत आठ गाढवांना पकडून बांधून ठेवण्यात आले आहे. ही गाढवं पुन्हा रस्त्यावर येऊ नयेत यासाठी मालकांवर दंडात्मक कारवाई करण्याचा पवित्रा पालिका प्रशासनाने घेतला आहे.
चिपळूण शहरामध्ये गाढवांचा वावर वाढल्यामुळे नागरिकांसह वाहनचालकांकडून प्रशासनाकडे तक्रारी येत होत्या. त्यामुळे काही महिन्यांपूर्वी पालिका प्रशासन आणि आरोग्य विभागाने गाढवांच्या मालकांची बैठक घेतली होती. तसेच त्यांच्यावर कारवाई करण्याचाही इशारा दिला होता. त्यानंतरही शहर परिसरासह बाजारपेठेत या उनाड गाढवांचा वावर कमी झाला नाही. नागरिकांना होणाऱ्या या त्रासाविरोधात युवक काँग्रेसचे जिल्हाध्यक्ष साजिद सरगुरोह आणि नागरिकांनी थेट पालिकेवर धडक दिली होती. शहरातील मोकाट गाढवं आणि उनाड गुरांच्या विषयाकडे लक्ष वेधले होते. या जनावरांवर कारवाई झालेली नाही तर त्यांना पकडून पालिकेच्या आवारात बांधले जाईल, असा इशाराही दिला होता. पालिका प्रशासनाने त्याची गंभीर दखल घेत तातडीने कारवाईची मोहीम हाती घेतली आहे. बुधवारी शहरात फिरणाऱ्या आठ गाढवांना पकडण्याची कारवाई केली. ही सर्व गाढवं शहरातील गांधीनगर, बहादूरशेख नाका येथील असल्याची माहिती मिळत आहे. यापुढेही ही कारवाई सुरूच राहणार आहे. शहरात पकडलेल्या या गाढवांच्या मालकांवर दंडात्मक कारवाई केली जाणार आहे.
---
त्रास कमी करा
पालिकेने उनाड गुरे आणि मोकाट गाढवांविरोधात हाती घेतलेल्या कारवाईचे नागरिकांमधून समाधान व्यक्त केले जात आहे. तसेच भविष्यात गाढवांचा त्रास होऊ नये अशी मागणी करण्यात आलेली आहे. दिवाळी सणामुळे चिपळूण शहरातील बाजार परिसरात गर्दी वाढलेली आहे. वाहनांचीही रेलचेल असल्यामुळे मोकाट गुरांसह गाढवांचा त्रास अधिक होत होता. ही कारवाई कायमस्वरूपी ठेवावी अशी मागणी नागरिकांनी केली आहे.